اطلاعات روز: ارزګان کې تېره شپه طالبانو هغه کسان وهلي ډبولي دي چې د روژه ماتي وروسته ارزګان ښار ته د تفریح لپاره راوتلي وو.
ارزګان کې خلک د روژې په مياشت کې تر روژه ماتي وروسته ښار ته د تفريح کولو لپاره راوځي چې تيره شپه د طالبانو لخوا ورباندي بنديزونه لګول شوي دي.
د ترينکوټ ښار يو اوسيدونکي چې نه يې غوښتل نوم يې واخيستل شي د اطلاعات روز ورځپاڼې ته وويل چې تيره شپه طالبان تر روژه ماتي وروسته ښار ته راوتلي وو، او هغه کسان يې ووهل چې موسیقي يې اوريدله او يايې سلماني کې ږیره خریله.
نوموړی وايي که څه هم په تيرو کلونو کې به خلک د روژماتي وروسته د ښار واټونو ته د تفریح لپاره راوتل خو، سږکال داسې نده اوس ټول خلک د طالبانو له ویرې په کورونو کې ناست دي.
نوموړي وويل:«په يوه خياطۍ کې ځوانانان راټول شوي وو، په ډیر لوړ غږ يې موسیقي غږوله طالبان راغلل يوه يوه څپیړه يې ټول ووهل ورته يې وويل چې بیا موسیقي مه اورئ.»
په ورته وخت کې د ترينکوټ يوه بل اوسيدونکي چې د طالبانو لخوا د خلکو سره شوي تاوتريخوالي يې ليدلی دی اطلاعات روز ته وويل چې يوه ډله ځوانان چې تر روژماتي وروسته سره راغونډ شوي وو، او سندري يې اوريدلې طالبان راغلل او هغوئ يې د سندرو اوريدو څخه منعه کړل.
پر همدي وخت د ارزګان يو بل اوسيدونکی وايي طالبانو تيره شپه په ښار کې د نايانو ( سلماني) پر دوکانونو هم وګرځيدل او د هغو کسانو مخه يې نيوله چې سټايلي ويښتان يې جوړول او ږيرې يې خريلې.
د ترينکوټ ښار يو اوسيدونکی چې د طالبانو له ويري د نوم اخيستلو څخه ډډه کوي د اطلاعات روز ته وويل، تيره شپه تر روژماتي وروسته طالبان د ويښتانو جوړولو يوه دوکان ته ورغلل او هلته يې نايي او ږيره خريوونکي دواړه ووهل.
دی وايي طالبانو دوئ ته ګوت څنډنه وکړه که تردې وروسته بیا دغه عمل تکرار کړي سخته سزا به ورکړي. هغه د طالبانو دغه کړنه سم کار ونه بله او د طالبانو له مسولينو څخه يې غوښتنه وکړه چې خپل کسان دې ددغه ډول تاوتريخوالي څخه منعه کړي.
تردي مخکي هم طالبانو په ترينکوټ ښار کې پر ويښتانو جوړولو او ږيري خريلو بنديز لګولی و.
د ارزګان د اوسيدونکو په خبره، طالبان څو ځله په ترينکوټ ښار کې نايانو ته ورغلي او په جدي ډول يې ورڅخه غوښتي چې د سټايلي ويښتانو له جوړيدو او ږيري خريلو څخه ډډه وکړي.
په ارزګان کې د طالبانو سيمه ييزو چارواکو بیا د خلکو ددغو ادعاوو په اړه څه نه دي ويلي.