ننګرهار ولایت کې د طالبانو د کرنې او مالدارۍ ریاست مسوولین خبر ورکوي، چې سږکال په دغه ولایت کې د شفتالو حاصلات ډېر شوي دي.
د دغه ولایت د کرنې او مالدارۍ ریاست طالب ویاند اجمل سبحاني اطلاعات روز ورځپاڼې ته وویل، چې سږکال د ننګرهار په ۱۳ ولسوالیو کې پر ۳۰۰۰ جریبه ځمکه د شفتالو له ابادو باغونو ۱۰۰۰۰ ټنه حاصل ترلاسه کیدو تمه شته، چې د تېرو کلونو په پرتله ۳۵۰۰ ټنه زیاتوالی ښيي.
ښاغلی سبحاني وایي، تېر کال د شفتالو حاصلات ۶۵۰۰ ټنه و، چې ۲۵۰ میلیونه افغانۍ عواید یې لرل، خو سږ کال ۱۰۰۰۰ ټنو ته رسېدلي چې ۲۷۷ میلیونه افغانۍ عواید به ترې ترلاسه شي.
سبحاني زیاتوي:«سږکال د ننګرهار په ۱۳ ولسوالیو کې په ۳۰۰۰ جریبه ځمکه د شفتالو باغونه جوړ شوي چې حاصلات به یې د تیرو کلونو په پرتله زیات وي یعنې سږکال به لس زره ټنه حاصل ولرو چې تیره کال ته ۳۵۰۰ ټنه زیاتوالی ښیي او همدارنګه ۲۷۷ میلونه افغانۍ عواید تر راټول شوي دي.»
په ورته مهال باغ لرونکي هم د شفتالو د سږني کال له حاصلاتو خوښ دي.
خالد باچا چې په سره رود ولسوالۍ کې پر څلور جریبه ځمکه د شفتالو باغونو لري وایي، د تېرو کلونو په پرتله یې ګټه وټه زیاته شوې،خو د وچکالۍ له کبله د باغونو په ساتنه او پالنه زیات لګښت راځي، چې له امله یې باغداران له ستونزو سره مخ دي.
خالد پاچا وویل: «سږکال ډیر ښه دي باغونه که څه هم بې موسمه بادونه او بارانونه هم وشول خو له هر څه سره سره بیا هم سږکال حاصلات ډیر ښه شوي او ګټه یې هم زیاته شوې په خاص ډول د شفتالو، خو دا هر بوټی او دانه چې تاسې ګورئ، دا په پيسو باندې تر دې ځایه رسېدلی، د اوبو کولو لپاره یې ساعت درې سوه افغانۍ ورکوو، یو جریبه ځکه په دوه نیم ساعته کې اوبه کېږي. زه واټرپمپ ته نږدي یم، ځکه که لري وای، بیا ډېر وخت نیسي. دا زموږ ستونزې دي.»
خانولي بیا د شفتالو د پېر او پلور کاروبار کوي.
نوموړی وایي، په یوه وار په زیاته کچه شفتالو بازار ته عرضه کېږي او د لوی مارکېټ د نشتوالي، له کبله ښايي ګټه وټه يې زیاته نه وي.
دوی له حکومت غواړي چې د بازار موندنې په برخه کې ورسره مرسته وکړي.
خانولي زیاتوي:« دلته چې کله باغونه په حاصل راځي نو ټول تازه میوې په یو ځل بازار ته وړاندې کیږي چې له امله یې بیه هم کمیږي.»
له ننګرهار سربېره، په ختيځ کونړ ولایت کې هم پر سلګونه جریبه ځمکه د شفتالو باغونه جوړ شوي، چې د معلوماتو له مخې، د تېر په پرتله له زیاتوالي سره به ۹۰۰ ټڼه حاصل ولري.