اطلاعات روز: ننګرهار کې طالب چارواکي وایي، ددغه ولایت په کامې او ګوشتې ولسوالیو کې د «نفرایټ» په نوم د قیمتي ډبرې د یوولس کانونو قانوني استخراج پيل شو.
د دغه ولایت لپاره د طالبانو د کانونو ریيس مفتي عبدالحميد تېره ورځ (یک شنبه، ۱ د غبرګولي) اطلاعات روز ورځپاڼې ته وويل، د ننګرهار په کامې او ګوشتې ولسوالیو کې له پنځه سوه زرو څخه تر پنځه ميليونه او اووه سوه زره افغانيو په ارزښت د «نفرايټو» د يوولس کانونو قراردادونه تر سره او رسما يې کېندنې پیل شوې.
نوموړي زیاته کړه، دغه قراردادونه افغاني شرکتونو سره شوي او د دې کانونو د قانوني استخراج په جریان کې به ګڼ شمېر ولسي خلکو ته کاري زمینه هم برابره شي.
مفتي عبدالحمید زیاتوي:«د ننګرهار په کامې او ګوشتې ولسوالیو کې دنفرایټو د ۱۱ کانونو په قانوني ډول د استخراج چارې پیل شوې او دغه قراردادونه له افغاني شرکتونو سره شوي، چې په استخراج سره به یې د سیمې زرګونه کسانوته دکار زمینه برابره شي.
د کانونو رییس وایي، ننګرهار کې د شوکاڼي د کيندنو چارې هم پیل شوي او په کې زرګونه کسان په مستقيم او غير مستقيم ډول په کار بوخت شوي دي.
کرومایټ او نفرایټ قیمتي ډبرو کانونه د کونړ په خاص کونړ او د ننګرهار په ګوشتې او کامې ولسوالیو او نیږدې غرنیو سیمو کې موجود دي.
له دې وړاندې د دغو کانونو د ناقانونه استخراج او پاکستان ته د قاچاق رپوټونه هم ورکړل شوي وو. په همدې حال کې ځینو چینايي سوداګرو په ختیځو ولایتونو، خصوصا ننګرهار کې د قیمتي ډبرو په برخه کې د پانګونې خبر ورکړی دی.
