اطلاعات روز: کندهار کې طالب امنيتي چارواکي د دغه ولايت د سپين بولدک ولسوالۍ په «لوی لهر» کلي کې د يوه کس د جسد د پيدا کېدو خبر ورکوي.
د سپين بولدک ولسوالۍ له پاره د طالبانو امنیې قومندان محمد هاشم محمود نن (چهارشنبه، ۱۸ د غبرګولي) اطلاعات روز ته وویل، چې د دغه مړي جسد د همدې ولسوالۍ د پنځمې حوزې اړوند د «لوی لهر» په کلي کې غره ته څېرمه موندل شوی.
نوموړي زياته کړه، چې د مړه شوي کس جسد د لمر وړانګو سوځولی او د بدن ځينې غړي يې حيواناتو خوړلي.
د بولدک ولسوالۍ امنيې قومندان په وينا تراوسه نده معلومه شوې چې ياد کس څنګه او د چا له لوري وژل شوی.
محمود وایي، ياد کس څو ورځې وړاندې وژل شوی او له مړه شوي جسد سره پېژند پاڼه او نور اسناد شتون نه لري څو یې هویت په ډاګه شي.
هغه وايې، اوس مهال د وژل شوي کس جسد د سپین بولدک ولسوالۍ په دولتي روغتون کې پروت دی او د کورنۍ د غړو تر پيدا کېدو وروسته به یې هغوی ورته وسپاري.
د محمود له قوله: «د کلي خلکو جسد پيدا کړی و بيا زموږ سره په اړيکه کې شول او جسد مو د ولسوالۍ روغتون ته انتقال کړ، تر اوسه يې د کورنۍ غړي ندي پيدا شوي، جسد هم نه پېژندل کېږي چي څنګه وژل شوی او چا وژلی.»
د یادونې وړ ده چې کندهار کې وروستيو امنيتي پېښو د عامو وګړو اندېښنې راپارولي او د مخنيوي غوښتنه کوي.