اطلاعات روز: د امريکا د بهرنيو چارو وزارت وايي، چې لا هم داسې ابزار ورسره شته چې په وسيله يې کولای شي طالبان زده کړو ته د ښځو د لاسرسي په تړاو ځواب ويلو ته اړ کړي.
د امريکا د بهرنيو چارو وزارت مرستيال وياند ودانت پاټل پرون (چهارشنبه، ۳۱ د غبرګولي) په دې اړه د يوې پوښتنې په ځواب کې وويل: «له ما به مو وړاندې اورېدلي وي چې [زموږ چلند] له ښځو او نجونو سره د طالبانو له چلند سره تړلی دی.»
نوموړي د طالبانو د دې لېوالتيا په اړه چې غواړي د نړيوالې ټولنې له لوري په رسميت وپېژندل شي، وويل چې د نړيوالې ټولنې له لوري منل کېدو او مشروعيت ته د طالبانو په لېوالتيا کې يو مهم جز د ښځو د حقونو مراعتول دي.
ښاغلي پاټيل وويل: «تر څو چې هغوی خپل نيم نفوس ته هغه حقونه او امتيازونه ورنه کړي چې نيم نور ترې برخمن دي، نو نه يوازې افغانستان شاته بيايي بلکې د خپلې لېوالتيا پر وړاندې هم درېږي؛ د نړيوالې ټولنې له لوري د منل کېدو او مشروعيت لېوالتيا.»
طالبانو پر افغانستان تر واکمنېدو وروسته تر شپږم ټولګيو پورته نجونې ښوونځي ته له تلو منع کړې دي او پوهنتونونه يې هم د نجونو پر وړاندې تړلي دي.
د ملګرو ملتونو د عمومي منشي ځانګړې استازې او د يوناما رييسې رزا اوتنبايوا تېره ورځ د افغانستان په اړه د ملګرو ملتونو د امنيت شورا په غونډه کې وويل، چې تر څو طالبان پر ښځو بنديزونه لغوه نه کړي، د دې ډلې په رسميت پېژندل ناشوني دي.
