اطلاعات روز: په نورستان کې د طالبانو مسوولین وایي چې د دې ولایت د کامدېش ولسوالۍ په یوه ځنګله کې اور لګېدلی.
د دې ولایت د چاپېریال ساتنې ریاست لپاره د طالبانو ريیس سرتاج الدین صافي نن (دوشنبه، ۵ چنګاښ) وويل چې دا اور لګېدنه له پنجشنبې (۱ چنګاښ) ورځې راهيسي د کامدېش ولسوالۍ په پتیګل دره کې را منځته شوې.
صافی زیاتوي چې د اور لګېدنې له امله شاوخوا سل جریبه ځنګل سوځېدلی او اور لا هم دوام لري خو د نوموړي په وينا چې اوس مهال تر کنټرول لاندې دی.
دی وايي چې د اور په مړه کولو کې په زیاته کچه ولسي خلکو او د طالبانو سیمهییزو مسوولینو برخه اخيستې او هیله یې ښودلې چې ژر به دغه اور مړ کړل شي.
د نوموړي په وینا تر اوسه د اور لګېدنې لامل نه دی څرګند شوی.
سرتاج الدین صافي وویل چې د طبیعي پېښو په وړاندې د چمتووالي ریاست د اور لګېدنې د مهار په برخه کې ګډون کوونکو ولسي وګړو ته د خوراکي او غیر خوراکي توکو مرستې هم په پام کې نیولې دي.
بلخوا، د تېرې شنبې په ورځ د کونړ د پېچ درې ولسوالۍ په سوندرۍ او کوړنګل درو کې اورلګېدنه را منځته شوې چې د مسوولینو د مالوماتو له مخې شاوخوا ١٤ هکتاره ځنګل او د څارویو څړځایونه سوځېدلي.
تېر کال هم د نورستان ولایت د نورګرام ولسوالۍ په شام دره کې اورلګېدنه را منځته شوې وه، چې په سلګونه جریبه ځنګل او د څارویو څړځایونه یې له منځه وړي و.