اطلاعات روز: پکتیکا ولایت کې د طالبانو له امنیې قومندانۍ څخه په خپره شوې خبرپاڼه کې راغلي چې نن (یکشنبه، ۱۸ د چنګاښ) یې د دغه ولایت په ډیله ولسوالۍ کې په شاخوا ۲۰۰ جریبه ځمکه کرل شوي د چرسو بوټي له منځه وړي دي.
په خبرپاڼه کې راغلي چې دا اقدام د نشه يي موادو پر وړاندې د مبارزې مدریت له لوري د یو کمپاین پر مهال ترسره شوی او د ډیله ولسوالۍ په مختلفو سیمو کې د خلکو له خوا کرل شوي چرس له منځه وړل شوي دي.
د نشه يي موادو پر وړاندې د طالبانو د مبارزې مدیر حمیدګل وايي، د ډیله سربېره یې د ولسوالیو له امنیتي مسوولینو سره په ګډه هڅې پېل کړي، چې پاتې سیمې هم له نشه يي بوټو پاکې او چاته یې د کر اجازه ور نه کړي.
خو بل لورته بیا د پکتیکا ولایت بزګران د نشه يي بوټو کر د خپلو اقتصادي ستونزو د هواري لپاره لویه اړتیا بولي او وايي، که یې بدیل کې ورته نور حاصل خېزه تخمونه ورکړل شي نو نه غواړي چې د نشه يي بوټو کرکیلې ته دوام ورکړي.
دوی په دې برخه کې اړونده ادارې په بېغورۍ او توپیري چلند تورنوي او وايي، د موسېساتو له خوا ډېر کله د تخمونو، کیمیاوي سرې او نورو وسایلو برخه کې شوې مرستې تر دوی نه رسیږي او د اړیکو پر اساس هغو خلکو ته ورکول کیږي چې هیڅ کرکیله هم نه لري.
له دې وړاندې هم په پکتیکا کې د عملیاتو پر مهال په بېلابېلو سیمو کې پراخه ځمکې له نشه يي بوټو پاکې شوي، خو که یې د بدیل لپاره هڅې و نه شي نو د چرسو او نورو نشه يي بوټو د کر مخنیوی ستونزمن دی.