اطلاعات روز: د طالبانو تر مديريت لاندې د ازموينو ملي ادارې د کانکور ازموينې د لومړۍ دورې نېټه اعلان کړې ده.
د دې ادارې له خبرپاڼې سره سم چې نن (دوشنبه، ۱۹ د چنګاښ) خپره شوې، ټاکل شوې چې په باميان، بغلان، پکتيا، تخار، جوزجان، خوست، فارياب، لوګر، دايکندي، سرپل او غور ولايتونو کې د کانکور ازموينې لومړۍ دوره د جنګاښ مياشتې پر ۲۹مه او ۳۰مه ترسره شي.
د ازموينو ادارې په يادو شويو ولايتونو کې د کانکور د ګډونوالو د بايوميټريک معلوماتو د ثبت نېټې د چنګاښ ۲۷مه او ۲۸مه ښودلې دي.
د دې ادارې په وينا، په نورو ولايتونو کې به د کانکور ازموينې دويمې او درېيمې دورې او په پلازمېنه کابل څلورمه دوره ترسره کېږي چې نېټې به يې وروسته مشخصې شي.
د ازموينو ادارې په کانکور کې د نجونو د ګډون په اړه څه نه دي ويلي.
تېر کال نجونو په داسې حال کې په کانکور کې ګډون وکړ چې د ښوونځيو دروازې يې پر مخ تړلې وې.
خو سږکال لا هم څرګنده نه ده چې نجونې په کانکور ازموينه کې ګډون کولای شي او که نه، په داسې حال کې چې د پوهنتونونو دروازې د دوی پر مخ تړلي دي.