اطلاعات روز: د ايران د بهرنيو چارو وزير حسين امير عبداللهيان د بلخ ولايت په مرکز مزار شريف ښار کې ۲۵ کاله وړاندې د ايران پر قونسلګرۍ د طالبانو بريد «جنايت» ګڼلی دی.
دا بريد د ۱۳۷۷ لمريز کال د زمري د مياشتې پر ۱۷مه مزار شريف ښار ته د طالبانو د ننوتلو پر مهال وشو چې اته ډيپلوماټان او يو ايرانی خبريال پکې ووژل شول.
هغه وخت ايران طالبان د دې بريد مسوول وګڼل، خو دې ډلې په دې بريد کې لاس لرل رد کړل او دا يې يو «خپلسری» کار وګاڼه.
د ايران د بهرنيو چارو وزیر نن (سېشنبه، ۱۷ د زمري) د دې برید د کليزې په تړاو په يوه ټويټ کې ليکلي: «د ۱۳۷۷ لمریز کال د زمري مياشتې پر ۱۷مه طالبانو په مزار شريف کې د ايران پر سر کونسلګرۍ په بريد کولو جنايت ترسره کړ.»
د ايران د بهرنيو چارو وزارت د يوې اعلاميې په خپرولو سره ويلي، چې د زمري اوولسمه د «ډېري ترخې» خاطرې ياد دی.
د دې وزارت په اعلاميه کې راغلي، چې مزار شريف ښار ته د طالبانو د ننوتلو پر مهال، «د اخلاقي، انساني او نړيوالو تعهداتو بر خلاف» د ايران پر سر قونسلګرۍ بريد وشو او ډيپلوماټان او يو خبريال ووژل شول.
د ايران د بهرنيو چارو وزارت «د دې ترخې او نه هېرېدونکې پېښې له غندنې سره – سره» ويلي، چې د دې پېښې د بېلابېلو اړخونو د روښانه کېدو پر اړتيا د يوې قطعي غوښتنې په توګه ټينګار کوي.
د طالبانو حکومت او د دې ډلې چارواکو تر اوسه د ايراني ډيپلوماټانو او خبريال د وژلو په مناسبت او همدا راز په دې اړه د ايراني چارواکو څرګندونو ته غبرګون نه دی ښودلی.
په ايران کې د افغانستان سفارت د طالبانو په لاس کې دی او پر همدې اساس د ايران د حکومت او طالبانو تر منځ اړيکې نږدې ګڼل کېږي، خو داسې ښکاري چې د وروستيو مياشتو پر مهال د کابل او تهران تر منځ اړيکې د اوبو د لانجو پر سر ترينګلې شوې دي.
د زمري ۱۷مه د بلخ ولايت په مرکز مزار شريف ښار کې د طالبانو له لوري د ملکي وګړو په ځانګړي توګه د هزارهوو د ډلييزې وژنې ياد هم دی. د معتبرو بشري حقونو د بنسټونو راپورونه ښيي چې د ۱۳۷۷ کال پر مهال د طالبانو له لوري د مزار شريف ښار تر بیا نيونې وروسته د ښار «زرګونه ملکي» اوسېدونکي ووژل.
د فارسي بي بي سي په وينا، د بشر حقونو د څار راپور چې د ۱۹۹۸ د نوامبر پر ۱۰مه خپور شوی دی، په مزار شريف ښار کې يې د طالبانو په وسيله د ملکي وګړو د وژنې خبره وکړه. له دې راپور سره سم، «طالبانو تر خپلې وسې خلک ووژل» او په [مزار شريف] ښار کې چې څه پېښ شول، «وحشتناک» و.
