اطلاعات روز: د برېتانيا د پارلمان غړي پاول بريستو د طالبانو په لاس د کابل د سقوط د دويمې کليزې په مناسبت ويلي دي چې د افغانستان هزارهګان د دوو وروستيو کلونو پر مهال له «هدفي وژنو، شکنجې او تبعيض » سره مخ وو.
ښاغلی بريستو چې په عين مهال کې د هزارهګانو لپاره د برېتانيا د ټولو ګوندونو د پارلماني ډلې رييس هم دی، نن (سېشنبه، ۲۴ د زمري) يې خپل ويډيويي پيغام خپور کړی دی او د طالبانو په لاس د افغانستان سقوط يې د دې هيواد د وګړو لپاره «ناورين» ګڼلی دی.
دی وايي چې د دې پارلماني ډلې د رييس په توګه «زما دنده داده چې د هزارهګانو ستونزې مطرح کړم او د هغو د ترسره کولو لپاره به هيڅ فرصت له لاسه ورنه کړم».
د هزارهګانو لپاره د برېتانيا د ټولو ګوندونو پارلماني ډلې هم د طالبانو په لاس د کابل د سقوط د دويمې کليزې په مناسبت پر خپله وېيباڼه اعلاميه خپره کړې ده، ويلي يې دي چې د دوو وروستيو کلونو پر مهال هزارهګان د طالبانو او داعش په څېر افراطي ډلو له هدفي بريدونو سره مخ وو.
په اعلاميه کې راغلي دي چې د تاريخ په اوږدو کې په افغانستان کې هزارهګان د قومي او مذهبي تړاوونو له وجې له تبعيض او ځور سره مخ وو.
دې اعلاميې زياته کړې ده چې په وروستيو کلونو کې د هزارهګانو لپاره وضعيت بدتر شوی دی او د افغانستان تر سقوط وروسته د طالبانو او داعش په څېر افراطي ډلو د هزارهګانو پر خلاف هدفي بريدونه زيات کړي دي.
د هزارهګانو لپاره د برېتانيا د ټولو ګوندونو پارلماني ډلې ويلي دي، دا بريدونه چې د بم ايښوونې، ډزو او انسان تښتونې په توګه شوې دي، هدف يې ډار خپرول او هزارهګانو ته د ضعيف امنيت احساس ورکول و.
د برېتانيا د پارلمان دا ډله وايي چې هزاره ګان بايد په مسجدونو، روزنيزو مرکزونو او ټولنيزو عمومي غونډو کې د امنيت احساس وکړي، خو په تراژديکه توګه بريدونو پرې شوي دي.
دوی وايي چې دا بريدونه نه يوازي دا چې د انسانانو ژوند اخلي، بلکې د يوې ټولنې ارمانونه او هيلې هم له منځه وړي.
د برېتانيا د پارلمان دې ډلې په خپله اعلاميه کې ټينګار کړی دی: «موږ بايد د هزارهګانو له ټولنې سره ودرېږو او د دې بې معنا تاوتريخجنو اعمالو د پای ته رسېدو غوښتنه وکړو.»
دوی زياته کړې ده چې «موږ نشو کولای اجازه ورکړو چې د بې ګناه انسانانو ژوند د تعصب او نفرت له مخې واخيستل شي. دا زموږ ګډ مسووليت دی چې د ټولو لپاره له سولې، عدالت او برابرۍ دفاع وکړو».
د هزارهګانو لپاره د ټولو برېتانيايي ګوندونو پارلماني ډله په افغانستان کې له هزارهګانو سره د «سيسټماټيک تبعيض» او «عام وژنې» په تړاو په برېتانيا کې د مېشتو هزاره ګانو تر پر له پسې اعتراضونو وروسته جوړه شوې ده.
دې پارلماني ډلې خپل ماموريت اعلان کړی دی چې د هزارهګانو اړوندو مسايلو ته پام کوي او د «هزارهګانو د نسل وژنې» موضوع طرح کوي او همدا راز « د قربانيانو او پاتې شونو لپاره د عدالت په شمول، د هر اړخيزو ځوابونو ډاډ تر لاسه کوي، له هغوی سره مرسته کوي او په راتلونکې کې د جناياتو د نه تکرار اطمينان» حاصلوي.
همدا راز دوی خپل مسئوليت دا بيانوي چې «د برېتانيا د پارلمان استازو ته اطلاعات وړاندي کوي چې په افغانستان کې د نسل وژنې او بشريت پر خلاف د جنايت د مخنيوي لپاره ګډ اقدام وکړي».
