اطلاعات روز: د بلخ ولايت په مرکز مزار شريف ښار کې يو شمېر معترضو ښځو د نجونو په وړاندي د ښوونځيو او پوهنتونو د پرانيستنې غوښتنه وکړه.
دوی پرون (چهارشنبه، ۲۵ د زمري) په يوه پټ ځای کې د يوې غونډې پر مهال، د طالبانو له لوري د ښځو پر کار او زده ګړو لګول شوي بنديزونه نقد کړل.
دا غونډه د طالبانو په لاس د کابل د سقوط او په هيواد کې د جمهوري نظام د پاشل کېدو د دويمې کليزې په مناسبت جوړه شوې وه.
معترضينو په دې غونډه کې وويل چې مسلمانان د ښځو د کار او زده کړو مخالف نه دي او طالبان بايد له کار او زده کړو څخه د ښځو د محروميت بهير پای ته ورسوي.
دوی ويلي دي چې ښځې د تېرو دوو کلونو پر مهال په پر له پسې توګه «له تبعيضي چلند» سره مخ وې او د طالبانو د سياست قرباني شوې دي.
د دې معترضينو په وينا، د تېرو دوو کلونو پر مهال د طالبانو د سياستونو له وجې ښځې په ټولنيزه توګه منزوي شوې دي.
دوی له طالبانو غواړي چې د زده کړې او کار د حق په شمول د ښځو اساسي حقونه ومني.
طالبانو پر افغانستان تر دويم ځل واکمنېدو وروسته، تر شپږم ټولګي لوړې نجونې ښوونځي ته له تللو او محصلينې پوهنتون ته له تګ څخه راګرزولې دي.
همدا راز دې ډلې په دولتي ادارو، داخلي او نړيوالو غير دولتي سازمانونو او د ملګرو ملتونو په دفترونو کې د ښځو پر کار کولو بنديز لګولی دی.
