اطلاعات روز: په وروستيو لسو ورځو کې د څو خبريالانو تر نيول کېدو وروسته، په افغانستان کې د ملګرو ملتونو مرستندوی پلاوي (يوناما) له طالبانو غوښتي دي چې د بيان د ازادۍ درناوی وکړي.
يوناما نن (پنجشنبه، ۲۶ د زمري) پر ايکس پلټفارم ليکلي چې طالبانو د وروستيو لسو ورځو پر مهال په شپږو ولايتونو کې د رسنيو کارمندان نيولي دي.
په افغانستان کې د ملګرو ملتونو سياسي استازولۍ د نيول شويو کارمندانو د شمېر او د هغوی د وضعيت په اړه جزييات نه دي ورکړي.
يوناما زياته کړې چې له دې سره-سره افغان-فرانسوی خبريال مرتضی بهبودي او د نجونو د زده کړو فعال مطيع الله ويسا د روان ميلادي کال له پيله تر اوسه له طالبانو سره بنديان دي.
د ملګرو ملتونو مرستندوی پلاوي ويلي دي چې طالبانو ته «د نړيوالو قوانينو پر اساس د نظر او بيان ازادۍ ته د درناوي په تړاو د دوی ژمنې وريادوي».
همدا راز يوناما زياته کړې ده چې طالبانو ته د ټولو نيول شويو کسانو حقونه ور يادوي چې د خپلې کورنۍ او وکيل د ليدنې او همدارنګه په خپلو تورونو د پوهېدو حق لري.
«په بې مخينې توګه د خبريالانو ځپل»
د بې سرحده خبريالانو سازمان د وروستيو لسو ورځو پر مهال د افغان خبريالانو د نيولو بهير «بې مخينې ځپنه» بللې او ويلې يې دي چې په دې موده کې طالبانو نهه خبريالان نيولي دي.
د بې سرحده خبريالانو د اعلاميې له مخې، فقير محمد فقيرزی، جان آغا صالح، حسيب حساس، حبيب سراب، سيد وحدت الله ابدالي، شمس الله عمري، وحيدالرحمان افغانمل، عطاء الله عمر او پرويز څرګند هغه خبريالان دي چې په وروستيو لسو ورځو کې نيول شوي دي.
بې سرحده خبريالانو ويلي دي چې طالبانو دا خبريالان له کوم دليل پرته نيولي او له يوه تن پرته، نور ټول له دې ډلې سره بنديان دي.
دې بنسټ ويلي چې د طالبانو له لوري د نيول شويو خبريالانو د ساتل کېدو ځای هم مشخص نه دی.
بې سرحده خبريالان وايي چې اوس مهال په افغانستان کې وېره او نه ډاډ خپور دی او طالب چارواکو چې رسنيزو ازاديو ته د درناوي په تړاو کومې ژمنې کړې وې، دروغ وې.
دې نړيوال بنسټ ويلي دي چې معلوماتو ته د لاسرسي د حق د نقض مخينه «وحشتناکه» ده او د طالبانو رژيم «په بشپړه توګه مسوول» دی.
بې سرحده خبريالانو له طالبانو غوښتي دي چې نيول شوي خبريالان ژر تر ژره خوشي کړي او د رسنيو د ازادۍ حق په واقعي توګه تضمين کړي.
تر دې وړاندې هم د افغانستان د خبريالانو مرکز او د خبريالانو نړيوال فدراسيون په هيواد کې د خبريالانو د وروستيو نيونو په اړه اندېښنه څرګنده کړې او د طالبانو له بند څخه يې د نيول شويو خبريالانو ژر تر ژره خوشي کېدل غوښتي.