اطلاعات روز: د «افغانستان د ژغورنې لپاره د ملي مقاومت شورا» په نوم په بهر کې د مېشتو سياسي څېرو ډلې د افغانستان د خپلواکۍ د ورځې په مناسبت په خپل پيغام کې ويلي، چې د طالبانو په واکمنېدو سره د افغانستان خپلواکي تر پوښتنې لاندې راغلې. «زياتې چارې د بهرنيانو له لوري مديريت او مخته وړل کېږي».
دې جبهې طالبان «يوه افراطي ډله او د پرديو لاسپوڅي» بللي دي.
د دې شورا په اعلاميه کې راغلي: «سږکال د افغانستان د خپلواکۍ اخيستنې ورځ په داسې حال کې رارسېدلې چې د يوې افراطي ډلې او د پرديو د لاسپوڅو په واکمنېدو يو ځل بيا زموږ ازادي تر پوښتنې لاندې راغلې او عملا زياتې چارې د بهرنيو له لوري مديريت او رهبري کېږي.»
دې شورا زياته کړې، چې د ۱۲۹۸ لمريز کال پر مهال د زمري د مياشتې پر ۲۸مه د افغانستان خلکو د ازادۍ لپاره تر کلونو هلو-ځلو وروسته، خپلواکي تر لاسه کړه او هيله دا وه چې د خپلواکۍ تر سيوري لاندې به سالم حاکميت را منځته شي؛ خو ګڼو عواملو د خپلواکۍ د ساتنې او ټیکاو د تأمينېدو مخه ونيوله.
«د افغانستان د ژغورنې لپاره د ملي مقاومت شورا» زياته کړې، چې پر افغانستان د طالبانو په واکمنېدو سره، دا هيواد د «تروريزم د مثلث» له لوري اشغال شوی. د دې شورا په وينا د افغانستان طالبان، پاکستاني طالبان او القاعد د دې مثلث بېلابېل اړخونه دي.
همدا راز دې شورا ويلي، چې د افغانستان په داخلي چارو کې لاسوهنه چې اوس مهال يې عملا روانه ده، د سيمې د هيوادونو او نړۍ ستره تېروتنه ګڼي او دا د افغانستان له خپلواکۍ او ازادۍ سره خلاف کړنه بولي. دې شورا د مشخص هيواد نوم نه دی اخيستی.
نن ورځ د افغانستان د خپلواکۍ له يو سلو څلورمې کليزې سره برابره ده. د افغانستان پخواني پاچا امان الله خان د ۱۲۹۸ کال پر مهال د زنري پر ۲۸مه د افغانستان خپلواکي اعلان کړه. پخوا به دا ورځ په شاندارو مراسمو لمانځل کېدله.
د وروستيو دوو کلونو پر مهال چې طالبان پر افغانستان واکمن دي، د زمري ۲۸مه لمانځي او په دې ورځ يې عمومي رخصتي اعلان کړې ده.
په کابل کې هم د طالبانو مشران د زمري د ۲۸مې د لمانځنې په موخه يوې غونډه کې راټول شوي.
