اطلاعات روز: په کابل کې د ايران ځانګړي استازي او د دې هيواد د سفارت سرپرست حسن کاظمي قمي وايي، چې د ايراني ماهرينو له لوري په دهراوود کې د اوبو د کچې معلومونې له سټیشن څخه تر ليدنې وروسته، د روان کال په زمري مياشت کې د اوبو جريان په يوه عادي اوبيز کال کې تر مياشتنۍ کچې کم ګڼلی دی.
د ايران ځانګړي استازي نن (يکشنبه، ۲۹ د زمري) پر ايکس پلټفارم په يوه خپاره کړي پوسټ کې د دهراوود د اوبو د کچې معلومونې له سټیشن څخه د ايراني پلاوي ليدنه «د ۱۳۵۱ کال تړون ته د افغان لوري ژمنتيا او د دې تړون پر يو شمېر برخو عمل کول» بللي دي.
همدا راز نوموړي د اوبو د کچې معلومونې له سټیشن څخه د ايراني ماهرينو ليدنه «په باور جوړونه او ښه ګاونډيتوب کې د رغنده تعاملاتو د پېل مثبته نښه» ګڼلې ده.
د ايران ځانګړي استازي ويلي، «تمه کېږي چې ايران ته په دوامداره توګه منظم مياشتني معلومات او د اوبو د ارزونې شاخصونه ولېږل شي او له دې سټیشن څخه وخت پر وخت د ليدنو زمينه برابره شي او هر کال په دقيقه توګه د اوبو کمښت او زياتوالی معلوم او له هلمند سيند څخه د تړون د درېيمې مادې له ب بند سره سم په اندازه ګيرۍ کې د عدالت په مراعتولو د ايران حقابه ورکړل شي».
په هلمند سيند کې د ايران د حقابې په تړاو د دې هيواد او طالبانو تر منځ تر اوږده جنجال وروسته، د روانې لمريزې مياشتې پر ۲۱مه ښاغلي قمي خبر ورکړ چې ايراني کارپوهانو د ارزګان ولايت د دهراوود په ولسوالۍ کې د اوبو د کچې معلومولو له سټیشن څخه ليدنه کړې ده.
تر دې وروسته د طالبانو د بهرنيو چارو وزارت د یوې اعلامیې په خپرولو سره تاييد کړه، چې ايراني پلاوي په دهراوود کې د اوبو د کچې معلومولو له سټیشن څخه ليدنه کړې.
د طالبانو د بهرنيو چارو وزارت په اعلاميه کې راغلي و چې ايراني پلاوي د نورو کلونو په دوام روان کال د اقليمي بدلونونو له کبله تر نورمال اوبيز کال کم ګڼلی دی.
نن سهار د ايران د انرژۍ وزير علي اکبر محرابيان هم ویلي و، چې د دې پلاوي له راپور سره سم، په افغانستان کې وچکالي جدي ده.
د ۱۳۵۱ لمريز کال له تړون سره سم، په يوه عادي اوبيز کال او د هلمند په سينديزه حوزه کې د شپږ ميليارده او ۵۰۰ ميليونه متر مکعبه اوبو په شتون کې د ايران حقابه ۸۲۰ ميليونه متره مکعبه اوبه کېږي، خو د کومو کلونو پر مهال چې په هلمند سيند کې د اوبو کچه کمه وي، د ايران حقابه هم ورسره کمېږي.
