اطلاعات روز: د اسيا جام په روانو لوبو کې د بنګله دېش کرکټ ملي لوبډلې وکولای شول چې افغانستان ته په ۸۹ منډو سره ماتې ورکړي.
د بنګله دېش او افغانستان تر منځ نړيواله يو ورځنۍ لوبه نن (يکشنبه، ۱۲ د وږي) د پاکستان په لاهور ښار کې وشوه.
بنګله دېش لوبډلې د لوبې ټاس يا پچه وګټله او ويې کولای شول چې د پنځوسو اورونو په لوبولو سره افغان لوبډلې ته د ۳۳۵ منډو ستر هدف وټاکي. د بنګله دېش له لوري مهدي حسن ميراز او نجم الحسين شانټو سليزې جوړي کړې.
د افغانستان له لوري په توپ اچونه کې يوازي ګلبدين او مجيب الرحمان يوه-يوه ويکيټ واخيسته.
افغانستان په خپله توپ وهنه کې لومړی لوبغاړی رحمان الله ګربز پر لومړۍ منډه له لاسه ورکړ.
د افغانستان له لوري ابراهيم تر ټولو زياتې ۷۵ منډې وکړې او لوبډلمشر حشمت الله شهيدي هم وتوانېد چې ۵۱ منډې جوړي کړې.
افغان لوبډلې د بنګله دېش له لوري ورکړل شوی هدف پوره نه کړای شو او ټول لوبغاړي د ۲۴۵ منډو تر کولو وروسته په ۴۵ اوور کې وسوځېدل.
افغانستان به خپله دويمه راتلونکې لوبه د سپټمبر پر ۵ له سرېلانکا سره په همدې لوبغالي کې کوي.
په اسيا جام کې د پرمختګ لپاره بايد افغانستان سرېلانکا ته په ستر توپير ماتې ورکړي.
