اطلاعات روز: ننګرهار کې د طالبانو مسوولین وایي، چې د دغه ولایت د مومندرې ولسوالۍ اړوند تورخم ښارګوټي کې د پاکستان له لوري د دروازې د تړل کېدو په غبرګون کې ولسي خلکو لاریون او اعتراضیه غونډه وکړه.
ننګرهار کې د طالبانو د اطلاعاتو او کلتور ریاست په خپره کړې اعلامیه کې ویلي، چې دغه لاریون او اعتراضیه غونډه نن (دوشنبه، ۲۰ د وږي) د سلګونه ولسي خلکو او قومي مشرانو له لوري ترسره شو.
اعلامیه کې زیاته شوې، چې ولسي خلکو د پاکستان له لوري د تورخم دروازې تړل کېدل غندلي او له یاد هېواد یې غوښتنه کړې، چې ژر تر ژره دې د تورخم دروازه د ترانزیټ او مسافرو پر مخ خلاصه کړي.
قومي مشرانو ویلي، افغان مسافر او سوداګر د تورخم دروازې په تړل کېدو له سختو ستونزو سره مخ دي او غوښتنه کوي، چې نور دې یادې ستونزې ته د تاوتریخوالي پرځای د خبرو اترو له لارې د پای ټکی کېږدي.
تورخم دروازه له تېرو شپږو ورځو راهیسې د افغان طالبانو او پاکستاني پوځیانو ترمنځ د نښتې له امله تړل شوې.
په دغه نښه کې د طالبانو او پاکستاني پوځیانو په ګډون شاوخوا دیرش کسان مړه او ټپیان شوي وو.
د تورخم دروازې د پرانیستل کېدو په موخه تېره ورځ هم د طالبانو او پاکستاني چارواکو ترمنځ شاوخوا نیم ساعته ناسته شوې وه، چې د سرچینو د معلوماتو له مخې یاده ناسته بې پایله سرته رسېدلې وه او پاکستاني لوري د تورخم دروازې د پرانیستل کېدو غوڅه ژمنه نه وه کړې.
