اطلاعات روز: په کابل کې د اروپايي ټولنې د استازولۍ سرپرسته رافيلا آيوډيس وايي، چې دا ټولنه د خوړو نړيوال پروګرام ته ۱۰ ميليونه ډالر ورکوي تر څو د ابتدايه ښوونځيو ښځینه او نارينه زده کوونکو ته خواړه پرې برابر کړي.
نوموړې نن (شنبه، ۲۹ د تلې) پر خپله ايکس پاڼه د دې خبر په اعلان سره ليکلي، چې په افغانستان کې د ښوونځيو د تغذيې پروګرام په ښوونځي کې د نومليکنې او شاګردانو له حاضرېدلو سره هم مرسته کوي.
اروپايي ټولنې په دې وروستيو کې په هرات کې د زلزله ځپلو د ملاتړ او کليوالو ټولنو د ملاتړ لپاره هم مالي مرستې اعلان کړې دي.
اوسمهال د خوړو د نړيوال پروګرام په ګډون مرستندوی بنسټونه وايي، چې د بودیجې له کمښت سره مخ دي. دا پروګرام وايي چې سږکال يې ۱۰ ميليونه وګړي د مرستو ترلاسه کوونکو له لړليکه ايستلي دي.
په دې وروستيو کې په هرات کې زلزلې د هيواد په کچه بشري وضعيت نور هم سخت کړی دی. زلزله ځپلي هم لومړنيو موادو ته اړتيا لري.
