اطلاعات روز: د «ډیورنډ فرضي کرښې» ها غاړې چمن کې زرګونه کسانو د سپین بولدک-چمن پر لار تلوونکو مسافرو څخه د پاسپورټ غوښتلو په غبرګون کې لاریون کړی او وايي، چې مسافرو ته دې له پاسپورټه پرته د تګ راتګ اجازه ورکړل شي.
چمن کې د دغه لاريون یوه ګډونوال وکيل احمد هيواد اطلاعات روز ته وویل، چې نن (پنج شنبه، ۴ د لړم) د بېلابېلو قومونو زرګونه کسان د پاکستان د یادې پریکړې په غبرګون کې راوتلي او تر هغو به خپل لاريونونو ته دوام ورکړي ترڅو چې ځايي حکومت يې غږ نه وي اورېدلی.
هيواد دغه راز وایي، چې په چمن، کوټې، کراچۍ او نورو ښارونو کې له افغان کډوالو سره د پاکستاني پوځيانو «ظلمونه او بې عدالتي» نه شي زغملای او په همدې موخه یې د تېرو شپږو ورځو راهیسی پرلت وهلی او ترڅنګ په یې خپلو لاریونونو ته تر هغو دوام ورکړي ترڅو چې ځایي حکومتونه خپله پریکړه بدله نه کړي.
د دې لاريون یو بل ګډونوال حکمت الله زياته کړه، چې دغه لاريون ته د کندهار له سپين بولدک او پاکستان له کوټې، کراچۍ او نورو ښارونو څخه هم په زرګونه افغانان راغلي څو د خپلو حقوقو غوښتنه او دفاع وکړي.
حکمت الله وايي، د پاکستان ځايي حکومت تر نورو وختونو اوسمهال پر افغان کډوالو بنديزونه ډير کړي او دغلته له افغانانو سره روان وضعیت نور د زغملو نه دی.
بلخوا مشال راډیو په یوه راپور کې د پاکستان د بلوچستان ایالات د اطلاعاتو لنډمهالي وزیر جان محمد اڅکزي په خواله ویلي، چې پر دغه لار یې ځکه پاسپورټ او ویزه لازمي کړي ترڅو امنیت ټینګ او د قاچاق مخنیوی وشي.
دا په داسې حال کې ده چې په تېرو وختونو کې د کندهار او چمن خلکو ته په پیژندپاټه د تګ راتګ اجازه ورکول کیده، خو اوس له پاسپورټ او ویزې پرته نه شي کولای دواړو خواوو ته تګ راتګ وکړي.
