اطلاعات روز: په پکتيا ولايت کې د طالبانو د پوهنې رياست وايي، چې د دې ولایت په زرمت ولسوالۍ کې د «حداد فرهاد» کلتور مرکز په مالي لګښت د بابکرخېل متوسطه ښوونځي ته يوه مجهزه ودانۍ جوړه او ګټې اخيستنې ته وسپارل شوه.
د دغه ولايت له پوهنې رياست څخه په خپره شوې خبرپاڼه کې راغلي، چې ياده ودانۍ اړتيا ته په کتو کافي درسي خونې لري او په مجهز ډول تر جوړېدو وروسته نن (شنبه، ۶ د لړم) ګټې اخيستې ته وسپارل شوه.
که څه هم د دغې ودانۍ د مالي لګښت په اړه کره معلومات نه دي ورکړل شوي، خو ځايي اوسيدونکي او د ياد ښوونځي زده کوونکي د ودانۍ په جوړېدو خوښ دي او وایي، چې له دې وړاندې يې په يو نامناسب چاپيريال کې زده کړې کولې.
د معلوماتو له مخې پکتيا له هغو ولايتونو ګڼل کېږي چې لا يې هم ۶۰ سلنه ښوونځي ودانۍ نه لري او زده کوونکي يې په خورا سختو شرايطو کې زده کړې کوي، خو د پوهنې رياست له خوا په خپره شوې خبرپاڼه کې ۳۰ نورو ښوونځيو ته د ودانيو د جوړېدو ډاډ ورکړی دی.
