اطلاعات روز: په افغانستان کې د ملګرو ملتونو د مرستندوی پلاوي دفتر (يوناما) ويلي چې د تېرې يوې مياشتې پر مهال دا هيواد په کابل، بغلان او هرات ولايتونو کې پر هزاره او شيعه ټولنې د تاوتريخوالي د زياتېدو شاهد و.
دې دفتر نن (دوشنبه، ۱۳ د ليندۍ) پر ايکس په يوه پيغام کې د وروستيو بريدونو له قربانيانو سره خواخوږي ښوولې او غوښتنه يې کړې ده چې د دې بريدونو د عاملينو په تړاو دې څېړنې وشي او ودې پوښتل شي.
همدا راز يوناما له خطر سره د مخ وګړو د ملاتړ زياتېدو غوښتنه کړې.
درې ورځې وړاندې (جمعه، ۱۰ د ليندۍ) وسلوالو کسانو د هرات ښار په هزاره مېشتې جبريل سيمه کې د څلورو نارينهوو او دوو ښځو په شمول شپږ تنه ووژل. پر قربانيانو هغه مهال ډزې وشوې چې په يوه ريکشه کې سپاره و. د قربانيانو په منځ کې دوه شيعه روحانيان هم و.
د دې بريد عاملان تر اوسه معلوم نه دي او تر اوسه يې مسووليت هم کومې ډلې نه دی اخيستی.
د ليندۍ پر دویمه نېټه هم په جبريل سيمه کې د يوه وسلوال بريد په ترڅ کې د رجب علي اخلاقي او خادم حسين هدايت په نوم دوه شيعه روحانيون ووژل شول.
تر دې وړاندې هم د هرات په انجيل ولسوالۍ کې د عيد محمد اعتمادي په نوم شيعه عالم د تلې مياشتې پر ۳۰ نېټه وژل شوی و.
د لړم مياشتې پر ۱۶ نېټه د کابل ښار د هزاره مېشتي دشت برچي سيمې په عبدالعلي مزاري جاده کې يو کاسټر ډوله ښاري موټر په مرګونې چاودنه کې په نښه شو.
هغه وخت طالبانو د دې چاودنې تلفات اووه وژل شوي او ۲۰ نور ژوبل اعلان کړل. د دې بريد مسووليت داعش ډلې منلی و.
همدا راز د لړم مياشتې پر څلورمه په دشت برچي سيمه کې په «ملت» ورزشي سالن کې چاودنه وشوه.
د هغو شمېرو له مخې چې هغه وخت له روغتونو راټول شوي و، په چاودنه کې شپږ تنه وژل شوي او ۱۱ نور ژوبل شوي و خو د طالبانو پوليسو وروسته د دوو تنو وژل کېدل او د ۱۱ نورو ژوبلېدل تاييد کړل. د دې بريد مسووليت هم داعش ومانه.
د تلې مياشتې پر ۲۱ هم په بغلان ولايت کې له شيعه ګانو سره په تړلي يوه مسجد کې چاودنه وشوه.
د بغلان د ولايتي روغتون د روغتيايي سرچينو په وينا په دې چاودنه کې ۳۰ تنه ووژل شول او ۴۰ نور ژوبل شول. طالبانو د دې چاودنې د وژل شويو شمېر اووه او د وژل شويو شمېر ۱۵ اعلان کړ. د دې بريد مسووليت هم داعش ډلې ومانه.
دې ډلې په تېرو کلونو کې هم د شيعه ګانو او هزاره ګانو پر مذهبي ځايونو، ښوونځيو او غونډو بريدونه کړي دي. داعش تر اوسه د هرات په جبراييل کې د هزاره ګانو او شيعه ګانو د وروستيو وژنو په اړه څه نه دې ويلي.