اطلاعات روز: د طالبانو د لوړو زده کړو سرپرست وزیر ندا محمد ندیم کونړ ولایت ته د سفر پرمهال د داعش ډلې پر ځپل کیدو ټینګار کړی دی.
نوموړي تېره ورځ (شنبه، ٢٥ د لېندۍ) د کونړ په سید جماالدین افغان پوهنتون کې د ځینې پروژو د پرانیستې پر مهال یوې غونډې ته د وینا پرمهال داعش وسله واله ډله په هیواد کې د قومونو ترمنځ د مذهبي جګړې، نفاق او ګډوډۍ رامنځته کیدو مسووله بللې ده.
نوموړي ویلي، په ټول هیواد کې داعش ډله ځپل شوې او د هغوی د فعالیتونو د مخنیوي په برخه کې یې له طالب چارواکو سره د عام ولس همکاري مهمه بللې ده.
ندیم ویلي:«داعش ډله د ولس ترمنځ نفاق رامنځته کوي له ټول هېواد څخه د خوارجو ټغر ټول شوی او یاده ډله ځپل شوې، خو د لا مخنینوي برخه کې د خلکو همکاري مهمه ده، له خلکو غواړو چې په هره سیمه کې داعش وسله وال ووینې په بې رحمۍ سره یې وځپي او یا طالب سرتیرو ته خبر ورکړئ.»
ندیم دغه راز زیاته کړې، د دین او هیواد دښمنانو پر وړاندې یې د بریا راز په دې کې دی چې په افغانستان کې یوازې یو حنفي مذهب دی او د هېواد ټول وګړي د همدې مذهب پیروان دي.
له دې وړاندې طالب چارواکو ویلي و، چې په هیواد کې یې داعش ډله ځپلې او اوسمهال له دوی سره د مخامخ جګړې کولو او فعالیت توان نه لري، خو اوس د لوړو زده کړو وزیر له خبرو انګیرل کیږي چې ګواکې داعش ډله لاهم د طالبانو حکومت لپاره لوی سرخوږی دی.
له دې وړاندې هم په کونړ، نورستان، ننګرهار او د هیواد په ځینو سیمو کې د داعش ډلې د بیا فعالیت راپورونه ورکړل شوي وو.