اطلاعات روز: کونړ کې ځایي سرچینې ادعا کوي، چې طالبانو د دغه ولایت په یو شمېر دولتي ښوونځیو کې «د شیطان لښکر» په نوم د داعش ضد مفکورې کتاب ویشلی دی.
یوې باوري سرچینې چې نه یې غوښتل نوم یې خپور شي اطلاعات روز ورځپاڼې ته نن (دوشنبه، ۴ د مرغومي) وویل، چې طالبانو دغه کتاب له څو ورځو راهیسې د کونړ د مرکز اسعد آباد او څېرمه ولسوالیو اړوند ټولو دولتي او خصوصي ښوونځیو کې وېشلی دی.
سرچینې زیاته کړه، چې دغه کتاب په کونړ کې د طالبانو استخباراتو او اطلاعاتو او کلتور ریاست له لوري وېشل شوی او زده کوونکو ته یې د دغه کتاب د لوستلو سپارښتنه کړې.
د سرچینې په خبره، طالبان د زده کوونکو له لوري د داعش لښکر کتاب تر لوستلو وروسته له هغوی د همدغه کتاب اړوند ازموینه اخلي، چې په خبره یې تراوسه یې په عمراخان، شهید شهیم لېسو او کېرالې ښوونځیو کې ازموینې اخېستي او په نورو کې هم ازموینې روانې دي.
سرچینې وویل: «اسعد آباد او ولسوالیو کې طالبانو د شیطان لښکر په نوم کتاب تقسیم کړی، شاګردانو ته یې ویلي، چې دا کتاب په دوو هفتو کې ولولي، بیا به امتحان اخېستل کېږي او بیا به ممتازو شاګردانو ته ډالۍ ورکول کېږي.»
په دغه کتاب کې داعش ډله خوارج او د شیطان لښکر یاده شوې.
د سرچینې په وینا، د داعش ضد دغه کتاب کې په ښکاره ډول د داعش ډلې خلاف تبلیغات نه دي شوي، بلکې موخه یې دا ده، چې خلکو ته د داعش ضد فکر ورکړي او د طالبانو ملاتړي زیاتول دي.
تراوسه کونړ کې د طالبانو ځایي چارواکو په تړاو څه نه دي ویلي.
کونړ د هېواد یو له هغه ولایتونو دی، چې د پخواني جمهوري نظام له وخته تراوسه په کې داعش ډله فعالیت لري او وخت ناوخت له طالبانو سره نښتې هم کوي.
واک ته د طالبانو له رسېدو وروسته په کونړ او ننګرهار کې ګڼ شمېر اهل حدیث علماء او ولسي خلک له داعش ډلې سره د اړیکو په تور په مرموز ډول وژل شوي، چې خلک یې د طالبانو کار بولي.