اطلاعات روز: په لوګر ولايت کې د طالبانو د پوهنې رياست وايي، د دغه ولايت په مرکز پل عالم کې يو سوداګر ۶۰۰ نجونو ته د ديني زده کړو لپاره يو مرکز جوړ کړی دی.
لوګر کې د طالبانو د پوهنې رياست نن (شنبه، ۹ د مرغومي) په يوې خبرپاڼه کې ويلي، چې د «دارالقران» په نوم دغه مرکز د پل عالم اړوند په غيرت اباد سيمه کې د محمد اکبر اتل په نوم سوداګر په مالي ملاتړ جوړ شوی، چې د نورو اسانتياوو سربېره ورته ديني او نور درسي کتابونه، قرطاسیه او ژمنۍ البسه هم برابره شوې ده.
خبرپاڼه کې راغلي چې په ياد مرکز کې د ديني زده کړو سربېره نجونو ته د ښځينه ښوونکو له خوا عصري زده کړې هم ورکول کېږي.
محمد اکبر اتل له دې وړاندې په خپله سيمه کې سلګونه هلکانو او نجونو ته يو ښوونځی هم په خپل شخصي لګښت جوړ کړی دی.
خلک په داسې مهال په خپلو سيمو کې نجونو ته د زده کړو زمينه برابروي، چې له تېر شاوخوا دوه نيم کلونو راهيسې د طالبانو له خوا له شپږم ټولګي پورته ښوونځيو ته د تګ مخه نيولې او لاهم په دې برخه کې ټاکلی وخت نه دی څرګند شوی.