اطلاعات روز: کونړ او نورستان کې طالب چارواکي وايي، چې د دغو ولایتونو د مرکزونو او ولسوالیو ښوونځیو ته یې ۹ لکه، ۷۵ زره او ۳۷۷ درسي کتابونه ویشلې دي.
د کونړ د پوهنې ریاست لپاره د طالبانو رییس مولوي محب الله حیدري وايي، څو ورځې وړاندې یې د دغه ولایت د مرکز اسعد اباد او ټولو ولسوالیو اړوند ښوونځیو ته د ۸۲۵ زره او ۳۷۷ درسي کتابونو ویش پېل کړی وو، چې نن (دوشنبه، ۱۸ د مرغومي) پای ته ورسېد.
هغه وايي، په دغو کتابونو کې له لومړي ټولګي نیولې تر دولسم ټولګي کتابونه شتون لري، چې ورسره به د درسي کتابونو په برخه کې د زده کوونکو ستونزې حل شي.
بل لور ته نورستان کې د طالبانو د پوهنې رییس مولوي تاج محمد مطمئن وايي، چې د دغه ولایت په مرکز پارون او ولسوالیو کې ښوونځیو ته د ۱۵۰ زره درسي کتابونو د وېش بهیر پېل شوی، چې نږدې ورځو کې به یې د وېش چارې بشپړې شي.
نوموړي دغه راز دغلته د مسلکي ښوونکو کموالی ننګونکی بللی او د یادې ستونزې د حل ژمنې یې تازه کړي دي.
نورستان او کونړ د هېواد یو له هغو ولایتونو دي، چې په تېر شل کلن جمهوري نظام کې د وسله والو ډلو د فعالیت له امله یې د نورو برخو ترڅنګ د پوهنې برخه سخته زیانمنه شوې، چې له امله یې زرګونه زده کوونکي له زده کړو بې برخې او ګڼ ښوونځي د جګړو له امله وېجاړ شوي، چې لا یې هم د جوړولو لپاره ځانګړې پاملرنه نه ده شوې.
