اطلاعات روز: د ايران د پارلمان رییس محمد باقر قالیباف د تاجکستان د پارلمان له رییس رستم امام علي سره په ليدنه کې ويلي، چې داعش د افغانستان په ګاونډيو هيوادونو کې د ناامنۍ خپرولو په لټه کې دی.
د ايران د دولتي خبري اژانس په وينا، قالیباف د کرمان د وروستيو چاودنو «ريښه» په افغانستان کې د داعش د فعاليت نتيجه ګڼلې ده.
د تېرې اونۍ د چهارشنبې په ورځ د کرمان ولايت په «ګلزار شهدا» سيمه کې د ايران د سپاه پاسداران ځواک د قدس څانګې د قومندان قاسم سليماني د مرګ د څلورم تلين په مراسمو کې د شلو دقيقو په واټن دوې چاودنې وشوې.
د ايراني رسنيو په وينا، په دې دوو چاودنو کې ۹۰ تنه ووژل شول او لسګونه نور ژوبل شول. داعش ډلې د يوې اعلاميې په خپرولو سره د دې بريد مسووليت منلی دی.
د ايران د پارلمان رییس له خپل تاجکستاني سيال سره په ليدنه کې د تروريزم پر وړاندې په مقابله کې پر همکارۍ ټينګار کړی دی.
ده ويلي: «په اوسنیو شرایطو کې په افغانستان کې له تروريزم او د وسلو او نشه يي توکو له قاچاق سره د پراخې مقابلې لپاره همکاريو ته اړتيا لرو.»
همدا راز قاليباف په دې ليدنه کې په افغانستان کې د ټولګډونه حکومت پر جوړېدو ټينګار کړی دی.
ده ويلي: «د افغانستان اوسنی حکومت بايد په دې باور شي چې د دې هيواد له ټولو ډلو، قبايلو او سياسي جرياناتو له ګډون پرته نه شي کولای يو پايدار دولوت جوړ کړي؛ دا يوه ډېره مهمه موضوع ده چې د سيمې هيوادونه په ځانګړې توګه د افغانستان ګاونډي هيوادونه بايد دې ته پام وکړي.»
تر دې وړاندې هم ايراني چارواکو بيا – بيا د ټولګډونه حکومت پر جوړېدو ټينګار کړی دی؛ خو طالبان دا موضوع د افغانستان په کورنيو چارو کې لاسوهنه بولي.
