اطلاعات روز: د بښنې نړیوال سازمان له قيد او شرط پرته د طالبانو له زندان څخه د معترضې منيژې صديقي د خوشې کیدو غوښتنه کړې او د دې ډلې له استخباراتو يې غوښتي چې د ښځو «مجازات» دې پای ته ورسوي.
دې سازمان د منيژې صديقي د خوشې کېدو لپاره د يو کمپاين په پېلولو سره ويلي، چې معترضې ښځې د طالبانو د ظالمانه سياستونو له کبله په زور نيول شوي او ورکې کړل شوې دي او له شکنجې او نورو بدو چلندونو سره مخ دي.
د بښنې نړیوال سازمان زياته کړې، چې د بشري حقونو مدافع منيژه صديقي د ۲۰۲۳ کال د اکتږټوبر پر نهمه ورکه شوه او وروسته د طالبانو په زندان کې پيدا شوه.
د دې سازمان په وينا، صديقي د ۲۰۲۳ کال د ډسمبر پر پنځمه د طالبانو زندان ته وړل شوې ده.
د بښنې د نړیوال سازمان په وينا، دا معترضه ښځه په زندان کې وکيل يا هم له کورنۍ سره منظمې ليدنې ته لاسرسی نه لري او د شکنجې له خطر او نورو بدو چلندونو سره مخ ده.
دې سازمان ټينګار کړی، چې منيژه په هيڅ جرم نه ده تورنه شوې او بايد سمدستي او له کوم قيد او شرط پرته ازاده شي.
د بښنې نړیوال سازمان د يوه ليک په ليکلو سره د بشري حقونو له فعالانو غوښتي چې د دوی له لوري دې د طالبانو د استخباراتو رييس عبدالحق وثيق ته ورسوي او د منيژې صديقي د ازادېدو غوښتنه دې وکړي.
طالبانو څه موده وړاندې درې نورې معترضينې چې له دې ډلې سره بنديانې وې، خوشې کړې خو منيژه صديقي لاهم په بند کې ده. دې ډلې د دې معترضې ښځې د برخليک په اړه څه نه دې ويلي.
