اطلاعات روز: د بښنې نړیوال سازمان د طالبانو د استخباراتو رييس عبدالحق وثيق ته په يوه ليک کې د زدکړو د حقوو د دوو فعالانو احمد فهيم عظيمي او صديق الله افغان د خوشې کېدو غوښتنه کړې ده.
د بښنې د نړیوال سازمان په وينا، دې دوو تنو له «فکر بهتر» سازمان سره کار کاوه او د ۲۰۲۳ د اکتوبر مياشتې پر ۱۷مه د طالبانو د استخباراتو ادارې له لوري د کابل ښار په کارته چهار سیمه کې نيول شوي دي.
دې سازمان زياته کړې چې عظيمي او افغان د طالبانو پر خلاف په فعاليت تورن دي او د ډسمبر په ۲۷مه د طالبانو د محکمې له لوري محاکمه او د محکمې له حکم سره سم پلچرخي زندان ته لېږدول شوي دي. ويل شوي چې دې دوو تنو د طالبانو د استخباراتو رياست په څلوېښتم زندان کې ۷۲ ورځې تېرې کړې دي.
د بښنې نړیوال سازمان ويلي، چې د زده کړو د دې دوو فعالانو خپلسرې نيونه او بندي کول د بشر حقونو له نړيوالو قوانينو سره په ټکر کې دي او بايد له کوم شرط پرته خوشې کړل شي.
دې سازمان د طالبانو د استخباراتو رييس ته د فهيم عظيمي او صديق الله افغان د وضعيت په اړه انديښنه څرګنده کړې ده.
د بښنې نړیوال سازمان ويلي، چې دا دوه تنه په دروغو تورن شوي چې له هیواده د وتلو په لړ کې يې د نجونو له روباټيک سره مرسته کړې، معترضې ښځې يې راپارولي او اعتراضات يې سازماندهي کړي دي.
د دې سازمان په وينا، په خپله عظيمي او افغان او هم يې کورنۍ پر دوی لګېدلي تورونه ردوي.
د بښنې د نړیوال سازمان په وينا، د زده کړو دا دوه فعالان له عادلانه محکمې برخمن نه وو او د دوی محکمه يې ننګولې ده.
د بښنې د نړیوال سازمان په وينا، طالبانو په انتقامي اقداماتو کې دا دوه فعالان شکنجه کړي، له خوبه د محروميت او په انفرادي کوټو کې د بندي کولو په ګډون يې له هغوی سره بد چلند کړی، تر څو له هغوی اعتراف واخلي.
دې سازمان ټينګار کړی چې د احمد فهيم عظيمي او صديق الله افغان وضعيت د بيان د ازادۍ د حقونو او د سولييز لاريون او د عادلانه محاکمې د حقونو ښکاره نقض دی.
د بښنې نړیوال سازمان له طالبانو غوښتي چې له قيد او شرط پرته دې دا دوه فعالان ازاد کړي او د بشري حقونو له فعالانو سره دې د انسان تښتونې، خپلسرې نيونې، شکنجې او نور بد چلندونه ودروي.
دې سازمان د ښځو او نجونو پر زده کړو د بنديز د لېرې کېدو غوښتنه هم کړې.
