اطلاعات روز: د سویل ختیځ زون په پکتیا، لوګر، پکتيکا او خوست ولايتونو کې ځايي سرچينې وايي، د تېرو دريو ورځو په جريان کې د ورښتونو له کبله سېلابونه راوتلي چې د سيمې خلکو ته يې د مالي زيان سربېره ځاني تلفات هم اړولي دي.
د پکتیا په مرکز ګرديز ښار کې سيمه ييزې سرچينې وايي، تېره شپه (دوشنبه، ۲۷ د وري) د دې ولایت په وزې ځدراڼ ولسوالۍ کې په يو کور غر ښويېدنه شوې چې د ښځو او ماشومانو په ګډون د يوې کورنۍ ۵ غړي په کې مړه شوي.
د سرچينې په حواله پېښه د وزې ځدراڼ ولسوالۍ په «خوساچنګي» سيمه کې رامنځته شوې.
د دې پیښې په اړه طالب مسوولینو تر اوسه څه نه دي ویلي.
دغه راز په لوګر ولايت کې د طالبانو اطلاعاتو او کلتور رياست د يوې خبرپاڼې په خپرولو سره ويلي، چې وړمه شپه د دغه ولايت په ډیری ولسواليو کې شديد ورښتونه شوي چې په خروار ولسوالۍ کې د يوې خونې چت پرېوتو پېښه کې يوه ښځه مړه شوې او يو بل ماشوم ټپي دی.
د ياد ولايت د کرنې او مالدارۍ رياست لپاره د طالبانو د عوايد تنظيم آمر قاري عبدالبصير شاهد وايي، په ازره ولسوالۍ کې سېلابونو له امله ۱۰۰ جريبه کرنيزه ځمکه، ۵۰ کورونه، لسګونه څاروي او ځينې باغونه له منځه تللي دي.
د دغه زون په پکتيکا کې هم سېلابونه راوتلي چې خلکو ته په کې مالي زیانونه رسیدلي دي.
په دې ولایت کې له تېرو څو ورځو راهيسې ورښتونو زور اخيستی، د دغه ولايت لپاره طالب مسوولينو ويلي، چې د دغه ولايت په ځينو ولسواليو کې تېره شپه سېلابونه راوتلي چې د سيمې د اوسېدونکو د ۲۵ په تعداد د استوګنې کورونه يې نړولي او هم يې ۸۰۰ جريبه کرنيزه ځمکه له منځه وړې ده.
مسوولينو زياته کړې چې د ولايت مقام تر رهبرۍ لاندې بېړنۍ ناسته هم شوې او ځينو سېلاب ځپلو خلکو ته يې لومړنۍ مرستې رسولې دي.
تر اوسه په ياد ولايت کې د ځاني زيان په اړه خبرونه نه دي ورکړل شوي.
د يادونې ده چې د خوست په مرکز او ځينو سيمو کې هم ورښتونو مالي تاوان اړولی او د ځاني زيان په اړه نور جزيات نه دي ورکړل شوي.
د طالبانو حکومت طبیعي او بېړنيو پېښو ته د رسېدو وزارت په يوې خبرپاڼه کې د وروستيو ورښتونو له امله د اوښتي زيان معلومات شريک کړي او ويلي یې دي چې تر اوسه د دغو سېلابونو له کبله شاوخوا ۵۰ کسانو ته مرګ ژوبله اوښتې ده.