اطلاعات روز: د اسلامي همکارۍ سازمان د دغه سازمان له غړو هېوادونو، د نړۍ له هېوادونو او مرستندويه سازمانونو غوښتي چې په افغانستان کې له سېلاب ځپلو سره بېړنۍ مرستې وکړي.
په تېرو څو ورځو کې د افغانستان شمالي او لوېديځ ولايتونه کې ويجاړوونکي او مرګوني سېلابونو راوتلي دي.
د شمېرو له مخې یوازې په بغلان کې له ۳۰۰ ډېر کسان مړه شوي دي. په تخار کې بیا سیلابونو د څه باندې ۲۰ کسانو ژوند اخیستی دی.
د مالي زیانونو اندازه تر اوسه نه ده معلومه، خو ویل کېږي چې سیلابونو په سلګونو کورونه ویجاړ کړي او زیربناوو او کرنیزو ځمکو ته یې سخت زیانونه اړولي دي.
د اسلامي همکاریو سازمان تېره شپه (شنبه، ۲۲ د غویي) په یوې اعلامیه کې ویلي، چې د اوسني سېلاب غمجنې پایلې باید د اسلامي ټولنې او له هغې هاخوا د خطر زنګ ووهي.
دغه سازمان ویلي، چې د بیړني حالت په توګه په خپلو ټولو غړو هیوادونو او د نړۍ له نورو هیوادونو او همدارنګه د مرستندویه ادارو څخه غواړي چې د افغانستان د سیلابونو ځپلو خلکو سره ژر تر ژره ژوند ژغورونکې مرستې وکړي.
د اسلامي همکاریو سازمان ویلي، چې د زیانمنو کورنیو او ماشومانو مخ په زیاتیدونکی شمیر به په راتلونکو ورځو او اونیو کې د ژوندي پاتې کیدو او رغیدو لپاره بیړنیو مرستو ته اړتیا ولري.
په افغانستان کې په داسې حال کې ویجاړونکي سیلابونه راوتلي، چې د دغه هېواد خلک له فقر او لوږې سره هم مخ دي. د ملګرو ملتونو په وینا، د هیواد تر نیمایي ډیر نفوس بشري مرستو ته اړتیا لري.
