اطلاعات روز: د طالبانو تر مديريت لاندې د احصاييې او معلوماتو ادارې له شمېرو سره سم، افغانستان د تېر لمريز کال (۱۴۰۲) پر مهال تر شپږ ميلياردو او ۷۹۸ ميليونه ډالرو زيات د سوداګرۍ بیلانس کسر درلود.
دې ادارې نن (چهارشنبه، ۲۶ د غويي) د تېر کال پر مهال د هيواد د وارداتو او صادراتو ارزښت خپور کړی.
د احصاييې او معلوماتو ادارې په وينا، د ۱۴۰۲ کال پر مهال د افغانستان د وارداتو او صادراتو ټولټال ارزښت ۱۰.۳ ميليارده ډالرو ته رسېږي.
له خپرو شويو شمېرو سره سم، افغانستان د ۱۴۰۲ کال پر مهال د اتو ميلياردو او ۵۷۶ ميليونه او ۳۰۰ زره ډالرو په ارزښت واردات او د يو ميليارد او ۷۷۷ ميليونه او ۹۰۰ زره ډالرو په ارزښت صادارت کړي دي.
د احصاييې او معلوماتو ادارې له معلوماتو سره سم، په وارداتي اجناسو کې نفتي مواد او غوړي د يو ميليارد، ۳۷۷ ميليونه او ۹۰۰ زره ډالرو په ټوليز ارزښت سره د لړليک په سر کې ځای لري. په همدې توګه ماشينونه، ټرانسپورټي وسایط او پرزه جات په لړليک کې دويم ځای لري چې ارزښت يې يو ميليارد، ۱۵ ميليونه او ۹۰۰ زره ډالره کېږي او همدا راز ټوکر، فلزات او فلزي محصولات په درېيمه او څلورمه درجه کې دي.
د دې ادارې په وينا، د تېر کال پر مهال د هيواد په صادراتو کې مېوې په لومړۍ درجه کې وې چې ټولټال ارزښت يې ۶۴۵ ميليونه او ۵۰۰ زره ډالرو ته رسېږي. همدا راز طبي نباتات، معدني مواد او سبزیجات په دويمه، درېيمه او څلورمه درجه کې دي.
د افغانستان د وارداتو او صادراتو پرتلنه ښيي چې دې هيواد د تېر کال پر مهال په سوداګريز بيلانس کې شپږ ميليارده، ۷۹۸ ميليونه او ۴۰۰ زره ډالره کسر درلود.
د افغانستان له لوري تر ټولو ډېر صادرات پاکستان، هند او چين ته شوي دي.
تر ټولو زيات واردات هم له همدې دریو هيوادونو څخه ترسره شوي دي.