اطلاعات روز: د ننګرهار او لغمان ولایتونو یو شمیر کروندګر وایي، چې د غنمو د تهریشرو له پیلېدو سره سم طالبانو له خلکو د «عشر» ټولولو لړۍ پېل کړې او هغه کسان چې انکار کوي سزا ورکول کېږي.
د ننګرهار د ګوشتې ولسوالۍ اوسیدونکی رحیم الله وایي، سږني حاصل ته رسیدلي د غنمو فصلونه یې وروستیو ورښتونو او سیلابونو زیانمن کړي، چې له کبله یې نه یوازې حاصلات کم شوي بلکې خپل لګښتونه یې هم نه دي پوره کړي.
د نوموړي په خبره سږ کال د کروندګرو فصلونه تر بل هر وخت زیانمن شوي، خو طالبان له دې هر څه سره سره له دهقانانو د زراعتي حاصلاتو «عشر» راټولوي او هغه بزګران چې د عشر له ورکولو انکار کوي د طالبانو له لوري مربوطه ولسوالۍ ته جلبیږي او سزا ورکوي.
رحیم الله زیاتوي: «سږکال مې د بل چا څلور جریبه ځمکه په دهقانۍ کرلې وه، خو بې وخته باران او سیلابونو مو د ټول کال خواري له خاورو سره خاورې کړه اوس مو څه پاتې غنم تهریشل کړل؛ نو طالبان راغلل او عشر یې راڅخه د پوره ځمکې واخېسته که عشر ورنه کړو په لانجه ورسره اوړو غوښتنه مو دا ده چې سږکال باید طالبان له مونږ سره مرسته وکړي او عشر معاف کړي.»
د نوموړي په خبره نه یوازې په ګوشتې ولسوالۍ کې بلکې د ننګرهار په ټولو ولسوالیو کې د درمندونو په وخت کې طالبان د خلکو د حاصلاتو لسمه برخه د عشر په نوم ټولوي.
د لغمان کروندګر هم د طالبانو له ورته چارې شکایت کوي او وایي، له یوې خوا د فصلونو کم حاصل، بې روزګاري او له بلې خوا طالبان په یوې او بلې پلمې له هغوی «عشر» ټولوي.
دلاور د لغمان په الینګار ولسوالۍ کې پر بزګرۍ بوخت دی، نوموړی وایي چې طالبان د دغه ولایت په ټولو ولسوالیو کې په زور له خلکو «عشر» راټولوي.
هغه زیاته کړه، چې سږکال یې حاصلات لګښت نه پوره کوي او د طالبانو د عشر او زکات له مسوولینو غواړي، چې د «عشر» او زکات د راټولولو پرځای له اړمنو بزګرو سره مرسته وکړي.
دلاور وویل: «بزګران نو تنګ شوي ځکه له یوې خوا سږ کال د غنمو او نورو فصلونو حاصلات بارانونو تخریب کړل او له بلخوا په کې طالبانو د عشر راټولولو پسې بډې رابډ وهلي دي، د طالبانو له حکومت غوښتنه کوو، چې پر ولس دې د خپلو ګټو لپاره فشار نه راوړي.»
نوموړي زیات کړه د لغمان په ځینو سیمو کې طالبان کور پر کور ګرځي او له خلکو عشر راټولوي او یو شمیر هغه کسانو چې د عشر له ورکولو یې انکار کړی، د طالبانو له لوري وهل او ډبولو ترڅنګ زنداني شوي هم دي.
بلخوا طالب چارواکو هم منلې چې د منظم پلان له مخې او د خلکو په خوښه یې له هغوى عشر ټولول پېل کړي دي.
د ننګرهار د کرنې اوبو لګولو او مالدارۍ ریاست اړوند د عشر امریت لپاره د طالبانو امر مولوي سلیمان اسامه وایي، د دغه ولایت په ټولو هغو ولسوالیو کې چې غنمو تهریشرې پېل شوي د «عشر» ټولولو پروسه یې پېل کړې.
نوموړی وایي، که څه هم سږنی فصل ورښتونو او سیلابونو زیانمن کړی، خو د دوی د عُشر مامورین به په نرمۍ سره له خلکو غنم ټول کړي.
کروندګر وایي، له اسلامي اړخه د«عشر» له ورکولو انکار نه کوي، خو د خپل مالي توان او د کرنیزو عوایدو د کموالي له امله د طالبانو د عشر او زکات سره مخالف دي.
