اطلاعات روز: د ملګرو ملتونو د بشري مرستو د همغږۍ دفتر وايي، چې د ژمي پرمهال په افغانستان کې ځپل شویو سیمو ته د رسيدګۍ لپاره ۶۰۳.۵ میلیونه ډالري بودیجې ته بېړنۍ اړتیا لري.
دې بنسټ نن (چهارشنبه، ۲۱ د وږي) خپل «ژمني لومړیتوبونه» خپاره کړي او ليکلي يې دي چې دا بودیجه د ۲۰۲۴ کال د اکټوبر او ډسمبر میاشتو ترمنځ د ټاکل شویو لومړیتوبونو لپاره اړینه ده.
اوچا زیاته کړې چې ۱۰۴ میلیونه ډالرو ته د ۲۰۲۵ په لومړیو دریو میاشتو کې «تر لومړنیو موندنو وړاندې الزاماتو» لپاره ضروري دي.
دې بنسټ ويلي، چې د سکتوري ټاکل شویو لومړیتوبونو ترمنځ ۱۷۱ ولسوالۍ ډېر لومړیتوب لري، ۲۷۷ ولسوالۍ متوسطې او درې ولسوالۍ تر ټولو په ټیټه کچه کې ښودل شوې دي.
د ملګرو ملتونو د بشري مرستو همغږي کوونکي دفتر ويلي، چې دا لومړیتوبونه یې د تجربې، د وضعیت د تحلیل او د تېرو کلونو د لومړیتوب ټاکنې د تجربو له مخې مشخص کړي دي.
د اوچا دغه راز ویلي، چې د ژمي خطرونه ډېر او د زیانمنېدو کچه لوړه ده او خلمو ته کافي خدمات نه وړاندې کېږي.
د دې بنسټ په خبره، چې د ۲۰۲۴ کال پرمهال د افغانستان لپاره د بشري مرستې په بودیجه کې د ۲.۳ میلیاده ډالرو له کمښت سره مخ دي.
اوچا د روان کال پرمهال د افغانستان خلکو ته د مرستې رسونې لپاره د ۳.۰۶ میلیارده ډالرو مرستې غوښتنه کړې وه، خو وايي چې تر اوسه یې له دې بودیجې یوازې ۲۵ سلنه ترلاسه کړې ده.
دې بنسټ اعلان کړی و، چې د روان میلادي کال پرمهال په افغانستان کې ۲۳.۷ میلیونه وګړي بشري مرستو ته اړتیا لري، خو دوی ۱۷ میلیونه تنو ته لومړیتوب ورکړی.