اطلاعات روز: د افغانستان د خبریالانو مرکز وایي چې په تېر یو کال کې لږ تر لږه د ۱۲ ټلویزیوني شبکو فعالیت د طالبانو د مستقیمې لارښوونې او یا د دې ډلې له لوري د لګول شویو محدودیتونو له امله بند شوی دی.
دې مرکز نن (پنجشنبه،۱ د لیندۍ) په یوې اعلامیه کې چې د «د ټلویزیون د نړیوالې ورځې» په مناسبت خپره شوې، ویلي چې په افغانستان کې د ټلویزیوني شبکو پر فعالیت محدودیتونه په بېساري ډول زیات شوي دي.
د افغانستان د خبریالانو مرکز ویلي چې له ۲۱ هغو لارښوونو څخه چې طالبانو د رسنیو په تړاو صادر کړي دي، اووه یې په ځانګړي ډول د ټلویزیوني شبکو پر کار متمرکز دي او یا یې د تصویري رسنیو ازادي محدوده کړې ده.
دې مرکز زیاته کړې چې «په ملي ټلویزیون کې د ښځو د کار مخنیوی، په ټلویزیوني ډرامو کې د ښځو د ګډون منع کول، د فلمونو او سریالونو پر خپرولو بندیز، ښځینه خبریالانو ته د ماسک کارولو امر، د عکس پر اخیستلو او تصویري مرکو بندیز (چې تر دې دمه په څلورو ولایتونو کې په رسمي ډول پلی شوی دی)، په افغانستان کې د نړیوالو ټلویزیوني خپرونو بندیدل، د ټلویزیوني بحثونو د ژوندۍ خپرونې بندیز او د طالبانو د حکومت له خوا له تایید شویو کارپوهانو پرته نورو کسانو ته په پروګرامونو کې د بلنې پر ورکولو بندیز» هغه لارښوونې دي چې ټلویزیونونو ته شوې دي.
دې مرکز ویلي چې په ورته وخت کې د طالبانو له خوا د رسنیو پر وړاندې نور لګول شوي محدودیتونه هم د ټلویزونونو پر فعالیت اغېز کوي.
دې مرکز ویلي چې له هغو ۱۲ ټلویزیوني شبکو څخه چې په تېر یو کال کې د طالبانو په امر بندې شوې دي، یوازې یوه شبکه بېرته فعاله شوې ده.
د افغانستان د خبریالانو مرکز د اعلامیې له مخې، په دې موده کې لږ تر لږه ۳۰ خبریالان او د رسنیو کارکوونکي نیول شوي چې له ډلې یې اووه لا هم بندیان دي.
دې مرکز له طالبانو غوښتنه کړې چې د ټلویزیونونو په اړه پر صادرو شویو لارښوونو بیا کتنه وکړي.
دغه مرکز له نړیوالې ټولنې هم غوښتنه کړې چې د افغانستان د عامه رسنیو د قانون مطابق د رسنیو او په ځانګړي ډول د ټلویزونونو د فعالیت ملاتړ وکړي.
له کومه وخته چې طالبان پر افغانستان بیا واکمن شوي پر رسنیو او خبریالانو یې پراخ محدودیتونه وضع کړي دي.
دې ډلې د امر بالمعروف او نهي عن المنکر په قانون کې د ژوندیو موجوداتو د عکسونو پر خپرولو بندیز لګولی او د دې د عملي کېدو له امله په یو شمېر ولایتونو کې ځینې محلي ټلویزیوني شبکې مجبوره شوي چې خپل فعالیتونه ودروي.
