اطلاعات روز: لغمان کې د کورنیو تولیداتو د ودې او پياوړتیا په موخه د «خپل هېواد خپل تولید» په نوم دری ورځنی نندارتون د صنعت او سوداګرۍ ریاست په همکارۍ د يوه خصوصي شرکت له لوري پيل شوی او پکې څه باندې ۴۰ غرفو کې د کورنیو صنعتکارانو له خوا داخلي تولیدات نندارې ته اېښودل شوي دي.
لغمان کې د طالبانو د سوداګرۍ او صنعت رییس مولوي سلامت خان بلال نن (سې شنبه، ۲۱ د لېندۍ) وویل، په دې نندارتون کې د دغه ولایت پهګډون د ننګرهار، کونړ، کابل او یوشمېر نورو ولایتونو کورنیو تولیدي شرکتونو ګډون کړی دی.
د هغه په وینا د دې نندارتون له جوړیدو یې موخه کورنیو تولیداتو ته بازار موندنه، کورنیو تولیدي شرکتونو ترمنځ همغږي رامنځته کول او پېردونکو ته د کورنیو تولیداتو ښودل دي.
مولوي سلامت خان زیاتوي: «دا نندارتون به درې ورځې دوم کوي چې، پکې د لغمان، ننګرهار، کابل او نورو ولایتونو تولیدات نندارې ته اېښودل شوي، موخه یې کورنیو تولیداتو ته بازار موندنه، د تولیدي شرکتونو همغږي او خپل کورني تولیدات هیوادوالو ته ښودل دي.»
په همدې حال کې د نندارتون ګډونوال او صنعت کاران دا ډول نندارتونونه له کورنيو تولیداتو څخه د ملاتړ په برخه کې مهم بولي او له پانګوالو غواړي چې، د نورو هېوادونو پر ځای په کور دننه پانګونه وکړي.
د سید ولي په نامه یو صنعت کار چې په دغه نندارتون کې یې خپل تولیدات نندارې ته ایښي، دغه شان نندارتونونه خلکو ته د کورنیو تولیداتو د ورپېژندلو فرصت بولي، خو د یو شمېر ستونزو د حل غوښتنه کوي.
محمد ولي زیاتوي: «دا ډول نندارتونونه د کورنیو تولیداتو لپاره ډیر ګټور دي، ځکه له زیاتو تولیداتو خلک نه دي خبر او همدا نندارتونونه دي چې خلک له خپلو تولیداتو خبروي؛ غوښتنه کوو چې پر صنعت کارانو دې مالیه کمه شي او د برېښنا ستونزه دې هم حل شي.»
روان کال په ختیځ زون کې د ننګرهار او کونړ په ګډون لغمان درېیم ولایت دی، چې د کورنیو تولیداتو د ودې لپاره پکې ننداتون جوړېږي، د دغو نندارتونو موخه کورنیو تولیداتو ته وده ورکول او بازارموندنه ښودل شوې ده.
