اطلاعات روز: د خوړو نړیوال پروګرام وايي، چې د ژمي په رارسېدو سره په افغانستان کې میلیونونه کورنۍ له کافي خوړو پرته له یخنۍ سره مخ دي.
دې پروګرام نن (دوشنبه، ۲۶ د لیندۍ) ایکس کې پر خپله پاڼه ليکلي، چې اکثریت اړ کسان یو غیر ممکن انتخاب لري: یا خپلو اولادونو ته خوراک ورکول او یا هم د هغوی ګرم ساتل.
د ملګرو ملتونو د بشرپالو مرستو د همغږۍ دفتر (اوچا) ويلي، چې په افغانستان کې د ژمي پرمهال متضررو سیمو ته د رسېدګۍ لپاره ۶۰۳.۵ میلیونه ډالریزې بودیجې ته سمدستي اړتیا لري.
دې دفتر د روان میلادي کال پرمهال د افغانستان له خلکو سره د مرستې لپاره د ۳.۰۶ میلیارده ډالرو بودیجې غوښتنه کړې وه؛ خو ویل کېږي چې د دې بودیجې یوازې یو څه برخه تأمین شوې ده.
د اوچا په وینا، په افغانستان کې تر ۲۳ میلیونه ډېر وګړي مرستو ته اړتیا لري.
