اطلاعات روز: ننګرهار کې ځایي سرچینې وایي، چې د دغه ولایت څلور اوسیدونکو چې غوښتل یې د ایران له لارې په قاچاقي ډول ترکیې ته لاړ شي، په سرحدي سیمه کې پرې ایراني پولیسو ډزې کړي، چې پرمهال یې د فریدالله په نوم یو ځوان وژل شوی او درې نور لا تراوسه تري تم دي.
د وژل شوي ځوان د کورنۍ غړی نقیب احمد وایي، چې فریدالله پنځلس ورځې وړاندې د ایراني عسکرو له لوري په ډزو وژل شوی و، چې دوی له ډیرو هلو ځلو وروسته د هغه جسد د نیمروز له لارې را انتقال او تېره ورځ (جمعه، ٧ د مرغومي) یې ورته ننګرهار کې جنازه ادا کړه.
نقیب وایي، دوی په اصل کې د کامې ولسوالۍ د «داربنګ» قریې اوسیدونکي دي.
نوموړی زیاتوي: «فریدالله او درې نور ملګري یې چې دوه د کامې او بل یې د ښېوې ولسوالۍ اوسېدونکي دي، غوښتل یې د ایران له لارې ترکیې ته لاړ شي، چې هلته پرې ایراني پولیسو ډزې کړي فریدالله یې وژلی او د هغه درې کسانو درک نشته پنځلس ورځې وشوې چې مړی راڅخه ایراني قاچاقبرو ایسار کړی و او پېسې یې غوښتې په زر ډالر مو خبره وکړه او مړی یې راته راکړی پرون جمعه مو ورته جنازه وکړه.»
د نوموړي په خبره د فریدالله یو نېم کال کېده چې کوژده یې کړې وه او د بې روزګارۍ له کبله یې غوښتل بهر ته د مزدورۍ لپاره لاړ شي چې د ایراني پولیسو له لوري ووژل شو.
له دې نږدې دوه میاشتې وړاندې د لغمان درې اوسېدونکي هم د ایراني پولیسو له لوري د لارې په اوږدو کې په ډزو وژل شوي وو.
په دې وروستیو کې ایراني حکومت د افغان کډوالو پر وړاندې قوانین سخت کړي چې له کبله یې ډیر کله افغان ځوانان خپل ژوند له لاسه ورکوي.
