اطلاعات روز: په افغانستان کې د ملګرو ملتونو د مرستندویه پلاوي (یوناما) مشرې روزا اوتنبایوا د طالبانو د بهرنیو چارو د سرپرست وزیر امیر خان متقي سره په کتنه کې ویلي، چې په تیرو دریو کلونو کې د لومړي ځل لپاره له افغانستان سره د پرمختيايي مرستو کچه له بشري مرستو څخه زياته شوې.
د اوتنبایوا دا څرګندونې د طالبانو د بهرنیو چارو وزارت د مرستیال ویاند ضیا احمد تکل لخوا خپرې شوې دي.
د طالبانو دغه ویاند نن سهار (چهارشنبه، ۳ د سلواغې) ایکس کې پر خپله پاڼه لیکلي، چې د یوناما مشرې د متقي سره په کتنه کې وویل، چې په تېرو درېو کلونو کې د لومړي ځل لپاره له افغانستان سره د پرمختيايي مرستو کچه له بشري مرستو څخه زياته شوې او «دا يو خورا مثبت پرمختګ دی او د افغانستان پر اقتصاد به يې اغېز مثبت وي».
د طالبانو د بهرنیو چارو وزارت مرستیال ویاند دا هم لیکلي، چې د یوناما مشرې ډاډ ورکړی چې دا مثبت بدلون به دوام ومومي.
د ضیا احمد تکل په وینا، روزا اوتنبایوا د طالبانو د اقتصادي هڅو ستاینه کړې او ژمنه یې کړې چې دا لاسته راوړنې به د ملګرو ملتونو په ناستو کې شریکې کړي.
دغه راز د طالبانو د بهرنیو چارو سرپرست وزیر ادعا کړې چې د افغانستان اقتصاد د ودې په لور روان دی.
هغه ویلي، چې د اقتصادي پرمختګ په برخه کې نور پلانونه هم د تطبیق په حال کې دي.
طالبان دا ادعا داسې مهال کوي، چې د ملګرو ملتونو د بشري چارو د همغږۍ دفتر (اوچا) وايي، چې په ۲۰۲۵ کال کې به په افغانستان کې ۲۲.۹ میلیونه خلک بشري مرستو ته اړتیا ولري او د مرستو لپاره یې د ۲.۲۴ ملیارده ډالرو بودیجې غوښتنه کړې.
د اوچا په وینا، سږکال په افغانستان کې ۱۴.۸ میلیونه خلک د ژوندي پاتې کیدو لپاره خوراکي توکو او کرنیزو مرستو ته اړتیا لري.
اوچا په ۲۰۲۴ کال کې د افغانستان له خلکو سره د مرستې لپاره د ۳.۰۶ ملیارده ډالرو بودیجې غوښتنه کړې وه؛ خو د ملګرو ملتونو د وروستیو راپورونو له مخې، د دې بودیجې یوازې شاوخوا ۴۰ سلنه چمتو شوې وه.
