اطلاعات روز: ننګرهار کې طالب مسوولین وایي، چې د روان کال له پیل راهیسې یې تر اوسه د دغه ولایت په مختلفو سیمو کې د بېلابېلو جنایي جرمونو په تور یو زرو ۹۸۶ کسان نیولي دي.
د دغه ولایت د امنیې قومندانۍ لپاره د طالبانو مرستیال محمد طاهر مبارز دا څرګندونې نن (سې شنبه، ۲۳ د سلواغې) د یوې خبري ناستې پر مهال وکړې.
د مبارز په وینا ننګرهار کې د جنایي جرمونو کچه د تېر په پرتله کمه شوې او هڅې یې پیل کړي چې دا کچه صفر ته راکمه کړي.
نوموړي په یاده خبري ناسته کې دا هم وویل، چې په روان کال کې د ننګرهار په مربوطاتو کې د ترافیکي پېښو له کبله ۹۶ کسانو خپل ژوند له لاسه ورکړی دی.
د ننګرهار امنیې قومندانۍ لپاره د طالبانو مرستیال دغه راز وویل، چې په دغه ولایت کې یې یو زرو ۱۱۶ جریبه ځمکه د کوکنارو او بنګو له کښته پاکه کړې او د نشه یي توکو د مخنیوي پر وړاندې یې مبارزکه ګړندۍ کړې ده.
ننګرهار کې طالب مسوولین داسې مهال د بېلابېلو جرمونو په تړاو د یوشمېر کسانو د نیولو خبره کوي چې لاهم په مرکز جلال اباد ښار او ولسوالیو کې خلک له وسلهوالو غلاوو شکایت کوي.
د جلال اباد ښار د یوشمېر اوسېدونکو په وینا د پخوا په پرتله وسله والې غلاوې، انسان تښتوونې، هدفي وژنې او نورې جنایي پېښې څو چنده زیاتې شوي دي.
