اطلاعات روز: لغمان کې د طالبانو ځایي مسوولین وایي، چې د دې ولایت په الینګار او دولت شاه ولسوالیو کې د دوو جلا ترافیکي پېښو له امله دوه کسان مړه او پنځه نور ټپیان شوي دي.
د دې ولایت د امنیې قومندانۍ لپاره د طالبانو ویاند محمد یونس یوسفزی وایي، چې تېره ورځ (یکشنبه، ۲۴ د وري) د الینګار ولسوالۍ اړوند «چنچار پل» ته څېرمه د یو موټر سایکل او هندۍ ریکشې ترمنځ ترافیکي پېښه رامنځته شوې چې له امله یې یو کس مړ او پنځه نور ټپیان شوي دي.
نوموړي وویل، چې ټپيان شوي کسان د ځایي طالب مسوولینو او ولسي خلکو په مرسته ولایتي روغتون ته لیږدول شوي چې ډاکټرانو یې روغتیایي وضعیت د ډاډ وړ بللی دی.
د یوسفزي په وینا، همداراز پرون د لغمان د دولت شاه ولسوالۍ په «دګران» سیمه کې یو «سرف» موټر د ګړندي تګ له امله له سړکه اوښتی او چپه شوی چې په کې یوه کس خپل ژوند بایللی.
هغه وایي، یادې ترافیکي پېښې د موټرچلوونکو د ګړندي تګ او بېاحتیاطۍ له امله رامنځته شوې دي.
تر دې دوه ورځې وړاندې هم د لغمان اړوند د کابل-جلال اباد پر لویه لار د یوې ترافیکي پېښې له امله د دوو ښځو او درو ماشومانو په ګډون اوو کسانو ته مرګ ژوبله اوښتې وه.
د یادولو وړ ده چې په دې وروستیو کې د هیواد په بېلابېلو ولایتونو کې ترافیکي پېښې زیاتې شوي، چې لامل یې تر ډیره د موټر چلوونکو بې احتیاطي ګڼل کېږي.
