اطلاعات روز: د روسیې د ترهګرو ډلو له نوملړه د طالبانو تر ایستل کېدو وروسته د افغانستان په چارو کې د مسکو ځانګړي استازي ضمیر کابلوف ویلي چې «د افغانستان له اوسنیو واکمنو سره د سیاسي، اقتصادي او نورو رسمي تعاملاتو د پراختیا لپاره تر ټولو لوی حقوقي خنډ لیرې کړل شوی دی».
د روسیې سترې محکمې پرون د دې هیواد د لوی څارنوال په غوښتنه د «ممنوعه ډلو» له نوملړه د طالبانو له ایستلو سره موافقه وکړه.
د ټاس خبري اژانس له راپور سره سم، کابلوف په یوه ټلویزوني خپرونه کې ویلي: «موږ دلته نه تم کېږو، ځکه په دې لړ کې باید نور ګامونه واخیستل شي. که څه هم اوس به یې د جزییاتو په اړه خبرې کول وختي وي، خو په ډاډ دومره ویلای شو چې د روسیې او افغانستان تر منځ به یوه لویه سوداګریزه غونډه د می میاشتې په منځنیو وختونو کې په کازان کې جوړه شي.»
ده ویلي چې په دې غونډه کې به د روسیې د لومړي وزیر د مرستیال الکسي اورچوک په مشرۍ یو پلاوی او د طالبانو لوړپوړی دولتي او سوداګریز پلاوی ګډون وکړي.
روسي چارواکو د تېر میلادي کال پر مهال اعلان کړی و چې غواړي طالبان د ترهګرو ډلو له نوملړه حذف کړي. کابل ته د روسیې د ملي امنیت د عمومي منشي سرګیي شویګو د سفر پر مهال نوموړي طالب چارواکو سره ژمنه کړې وه چې ژر به د دې ډلې نوم د روسیې د ترهګرو ډلو له نوملړه ووزي.
د روسیې پارلمان هم د تېر لمریز کال د لیندۍ میاشتې پر مهال یو قانون تصویب کړ چې د دې هیواد د ترهګرو ډلو له نوملړه یې د طالبانو د نوم حذفولو لپاره قانوني زمینه برابره کړه.
تر روسیې وړاندې قزاقستان او قرغیزستان هم طالبان د ترهګرو ډلو له نوملړه حذف کړي دي.
مګر له دې سره-سره، تر اوسه هیڅ هیواد هم د طالبانو سرپرست حکومت په رسمیت نه دی پېژندلی.
