اطلاعات روز: ننګرهار کې د طالبانو سیمه ییز مسوولین وایي، چې د دغه ولایت په چپرهار او اچین ولسوالیو کې د تندر غورځېدو پېښو کې شپږ کسانو ته مرګ ژوبله اوښتې ده.
د دې ولایت د اطلاعاتو او کلتور ریاست لپاره د طالبانو د اطلاعاتو امر قریشي بدلون وایي، چې تېره ورځ (جمعه، ۲۹ د وري) ناوخته د چپرهار ولسوالۍ اړوند «ډاګو» سیمه کې د تندر لوېدو له کبله د نوید او سمسور په نامه دوه تنه تنکي ځوانانو ژوند بایللی او درې نور ټپیان شوي دي.
د قریشي په خبره، دغه راز پرون ماسپښین د اچین اړوند «باندر خوله» سيمه کې اسماني تندر لوېدلی، چې د هجران په نوم يو ۱۳ کلن هلک پکې خپل ژوند له لاسه ورکړی دی.
نوموړي دغه راز وایي، چې د ننګرهار په تورخم، شینوارو او نور بېلابېلو سیمو کې ږلۍ هم شوې، چې د کروندګرو غنم او د سبزیجاتو فصلونه يې زیات زيانمن کړي او په ځینو سیمو کې یې بیخي له منځه وړي دي.