اطلاعات روز: هلمند کې ځايي سرچينې خبر ورکوي، چې په دې ولايت کې د طالبانو استخباراتو یو دیني عالم بشیراحمد حنفي نيولی دی.
یوې سرچينې د نوم نه یادولو په شرط وویل، چې هغه د تېرې شنبې ورځ (۱۳ د غویي) د هلمند په مرکز لښکرګاه ښار کې نیول شوی دی.
سرچينه زیاتوي، چې مولوي حنفي د طالبانو د استخباراتو له لوري نيول شوی او تر اوسه يې د نيول کيدو اصلي لامل نه دی په ډاګه شوی.
د دغه سرچينې په خبره چې نوموړي په دې ورستيو کې د يو شمير جلا وطنه رسنيو سره د افغان نجونو د زده کړو په اړه مرکې کړې وې او ښایي له همدې کبله نیول شوی وي.
د سرچینو د معلوماتو له مخې مولوي بشیراحمد حنفي د مصر په الازهر پوهنتون کې د دوکتورا کچې محصل دی او په سویلي حوزه کې د پيژندل شوو ديني عالمانو په قطار کې راځي، چې لښکرګاه کې یوه دیني مدرسه او یو رسټورانټ هم لري او د همدې ښار اوسیدونکی دی.
هغه وخت ناوخت په خپله فیسبوک پاڼه د نجونو د زده کړو پر اهمیت ټینګار کړی او په دې وروستیو کې یې د نجونو لپاره د یوې جلا دیني مدرسې د جوړولو اعلان هم کړی چې ۱۰۰۰ تنه نجونې به پکې زده کړې کوي.
تر اوسه هلمند کې د طالبانو استخباراتو د دغه تازه نيونې په اړه څه نه دي ويلي، خو طالبان ټول هغه کسان چې د دوی پر حکومت نيوکې کوي نيسي او زندانونو ته يې اچوي.
