اطلاعات روز: کونړ کې ځایي سرچینې خبر ورکوي، چې ناڅرګندو کسانو د دغه ولایت په پېج درې ولسوالۍ کې یو ۱۷ کلن ځوان لومړی وژلی او بیا یې ترې سر او پښې پرې کړي دي.
یوې سرچینې وویل، چې دا تنکی ځوان چې سردارولي نومېده تېره شپه (یکشنبه، ۲۸ د غویي) د پېج درې ولسوالۍ په «سندرۍ» سیمه کې وژل شوی.
سرچینه زیاتوي، چې سردارولي د ښوونځي زده کوونکی و او تر وژل کېدو وروسته یې جسد په بوجۍ کې اچول شوی او سیند کې غورځول شوی و.
سرچینې د دې پېښې د انګېزې او قاتلینو د نیولو په تړاو څه ونه ویل.
تر اوسه کونړ کې ځایي طالبانو په دې اړه څه نه دي ویلي، خو ځایي سرچینې وایي چې طالبانو یې د وژنې په تور دوه کسان چې زوی او پلار دي نیولي دي.
دا په داسې حال کې ده، چې تېره ورځ د نورستان په نورګرام ولسوالۍ کې هم نا څرګندو وسله والو یو کس په ډزو وژلی و.
په دې وروستیو کې په ختیځو ولایتونو کې د پټو وژنو، ناامنیو او جنایي پېښو ګراف لوړ شوی چې خلک یې د مخنیوي په برخه کې طالبان پر بې غورۍ تورنوي.