اطلاعات روز: کونړ او ننګرهار کې ځایي سرچینې او طالبان خبر ورکوي، چې په دې ولایتونو کې د سیند اوبو کې د لامبو پر مهال درې کسان ډوب او مړه شوي دي.
کونړ کې یوې سرچینې وویل، چې تېره روځ (چهارشنبه، ۲۱ د غبرګولي) د دې ولایت د ماڼوګي ولسوالۍ په مناګي سیمه کې د سیند اوبو دوه کسان وړي دي.
سرچینه وایي، لومړنی کس له کندهاره راغلی سیلاني و، چې د سیند په اوبو کې د لامبو پر مهال ډوب او اوبو له ځانه سره یوړ چې د ژغورنې لپاره یې بیا د محمد ساپي په نوم یوه ځایي ځوان اوبو ته و ټوپ کړ چې هغه هم پسې اوبو لاهو کړی دی.
سرچینه زیاتوي، چې د کندهاري سیلاني جسد موندل شوی، خو د ځایي ځوان محمد ساپي جسد لا هم نه دی موندل شوی.
تر اوسه د دغې پېښې په اړه کونړ کې ځایي طالب مسوولینو څه نه دي ویلي.
ورته مهال ننګرهار کې د طالبانو محلي مسوولین وایي، چې تېره ورځ د دغه ولایت په کامې ولسوالۍ کې د کونړ سیند کې یو کس د لامبو وهلو پر مهال اوبو ډوب کړی او خپل ژوند یې له لاسه ورکړی دی.
د دغه ولایت د امنیې قومندانۍ لپاره طالب ویاند سید طیب حماد وایي، چې مړ شوی کس اباسین نومېږي او د ګوشتې ولسوالۍ د «اړخي» کلي اصلي اوسېدونکی دی.
هغه زیاتوي، مړ شوی کس کامې ولسوالۍ ته له خپلو ملګرو سره په چکر راوتلی و، چې د همدې ولسوالۍ په «ګرداب» سیمه کې د کونړ سیند کې د لامبو پر مهال اوبو ډوب کړی او خپل ژوند یې له لاسه ورکړی دی.
دا په داسې حال کې ده، چې هر کال د اوړي موسم په را رسېدو په ختیځو ولایتونو کې د سیند په اوبو کې د لامبو پر مهال ګڼ کسان ډوب او مړه کېږي.
