اطلاعات روز: چارواکي وايي، تېره شپه وسله والو طالبانو د کونړ ولایت په چپې درې ولسوالۍ کې پر یو شمېر حکومتي پوستو بریدونه کړي، چې د نن ورځې تر غرمې د دواړو لوریو تر منځ جګړه شوې ده.
د کونړ د والي ویاند عبدالغني مصمم نن (شنبه، ۱۴ د وري) اطلاعات روز ورځپاڼې ته وویل، دا جګړه د چپې درې ولسوالۍ په «ګلسلک» او ورڅېرمه سیمو د دواړو لوریو ترمنځ شوې چې وسله والو طالبانو ته یې درنه مرګ ژوبله اړولې ده.
هغه وایې، سیمې ته تازه دمې ځواکونه هم رسیدلي دي او د پېښې په اړه به بشپړ جزیات وروسته رسنیز کړي.
مصمم زیاته کړه: «د چپې درې په ولسوالۍ کې د وسله والو طالبانو او افغان ځواکونو ترمنځ جګړه شوې، طالبانو ته مرګ ژوبله اوښتې ده.»
په ورته مهال د ملي اردو د دویمې پلې لوا کې یوې سرچینې د نوم نه ښودلو په شرط اطلاعات روز ورځپاڼې ته وویل، جګړې کې دواړو خواو ته مرګ – ژوبله اوښتې او یو شمېر سرتیري وسله والو طالبانو له ځانه سره بېولي دي.
بل لور ته د کونړ ولایتي شورا مخکیني غړي نورالدین ساپي اطلاعات روز ورځپاڼې ته یاده جګړه تایید کړه او ویې ویل، د تیرې شپې جګړه کې د ملي اردو درې سرتیري وژل شوي دي.
هغه زیاته کړه: «د تیرې شپې په جګړه کې چې د چپې درې په ولسوالۍ کې شوې د ملي اردو درې سرتیري وژل شوي او وسله والو طالبانو ته هم مرګ ژوبله اوښتې ده خو کره مالومات یې نشته.»
هاخوا طالب ویاند ذبېح الله مجاهد یوې اعلامیې کې ویلي، د کونړ په چپې درې کې یې یوه پوسته سقوط کړې، درې سرتیري یې وژلي او پنځه یې ژوندي وړي دي.
د طالبانو اعلامیې کې راغلي، بېګانۍ جګړه کې یې ګڼ شمېر وسلې هم له حکومته نیولي دي؛ خو حکومتي غاړې بیا د طالبانو دې ادعا په اړه څه نه دي ویلي.
