اطلاعات روز: په ننګرهار او لغمان ولایتونو کې ځایي سرچینې خبر ورکوي چې په دې ولایتونو کې تېره ورځ (پنجشنبه، ۶ د وږي) په درو جلا-جلا ترافیکي پېښو کې څلور تنه مړه شوي او پنځه نور ژوبل دي.
لومړۍ ترافیکي پېښه د تورخم – جلال اباد پر لویه لاره «سرخ دیوال» سیمه کې رامنځته شوې چې له امله یې یو فیلډر موټر د ګړندي تګ له امله له سړکه اوښتی او چپه شوی او له کبله یې دوه کسان مړه شوي او یو بل ټپي شوی دی.
همدا راز یوه بله سرچینه وایې چې د کونړ – جلال اباد پر لویه لاره د بهسودو ولسوالۍ په «بلند غر» سیمه کې هم د یو موټر سایکل او شترینګي ریکشې د ټکر له امله یو کس ژوند بایللی او درې نور ژوبلېدلي.
بلخوا د لغمان لپاره د طالبانو امنیې قومندانۍ د یوې خبرپاڼې په خپرولو سره ویلي چې تېره ورځ د کابل ـ جلال پر لویه لاره د قرغیو ولسوالۍ په «خیرو خېلو» سیمه کي یو «مارګله ډوله» موټر او موټر سایکل ټکر کړی چې له امله یې موټر سایکل چلوونکی مړ شوی او موټر چلوونکی ټپي شوی دی.
په دې وروستیو کې د هیواد په بېلابېلو سیمو کې ترافیکي پېښې زیاتې شوې او له کبله یې په لسګونو کسان مړه شوي او ژوبل دي.
