اطلاعات روز: د ملګرو ملتونو د بشري چارو د همغږۍ دفتر (اوچا) وايي، چې د افغانستان په ختیځ کې د زلزله ځپلو سره د مرستې لپاره ۱۰ میلیونه ډالر ځانګړي شوي دي.
اوچا پرون (دوشنبه، ۱۱ د وږي) په یو راپور کې ویلي، چې پنځه میلیونه ډالر د ملګرو ملتونو د «بیړنیو مرستو مرکزي صندوق» څخه د مرستو د پیل لپاره ځانګړي شوي او پنځه میلیونه نور ډالر د افغانستان د «بشردوستانه صندوق» څخه د زلزلهځپلو د ستونزو د هوارولو لپاره ځانګړي شوي دي.
دې بنسټ زیاته کړې، چې یو شمېر هېوادونو خپلې مرستې اعلان کړي او له نورو مرستهکوونکو سره د لا زیاتو سرچینو د جلب لپاره تماسونه روان دي.
د دې ادارې په وینا، چې بیړنۍ سرپناوې، غیر خوراکي توکي، اړین طبي توکي، د څښاک اوبه، د خوړو بیړنۍ مرستې او بیړنۍ روغتیایی اسانتیاوې لا هم د لومړیتوبونو په ډله کې دي.
اوچا په خپل راپور کې د زلزلې له امله د تلفاتو او زیانونو په اړه د طالبانو ارقامو ته اشاره کړې، او ویلي یې دي چې د ارزونې ټیمونه د دې شمیرو د تایید لپاره کار کوي.
طالبانو پرون ورځ اعلان وکړ، چې په کونړ کې د زلزلې له امله یو زرو ۴۱۱ کسان مړه شوي او درې زره او ۱۲۴ نور ټپیان شوي دي.
دې ډلې ویلي، چې په دې ولایت کې پنځه زره او ۴۱۲ کورونه ویجاړ شوي دي.
