اطلاعات روز: د ایران د خراسان رضوي ولایت د امنیتي او انتظامي چارو مرستیال امرالله شمقدري ويلي، چې روان کال کې يو ميليون او ۸۰۰ زره کډوال د دوغارون – اسلامکلا له لارې افغانستان ته ستانه شوي دي.
نوموړي د تسنیم خبري اژانس سره په یوه مرکه کې ویلي، چې د افغان اتباعو دا وتل په وروستیو کلونو کې تر ټولو لوی شمیر په ګوته کوي.
د ایران دې چارواکي زیاته کړې: «د ۱۲ ورځنۍ جګړې وروسته چې د اتباعو د وتلو د تر ټولو لوړ بهیر شاهدان وو، په وروستیو میاشتو کې دا لړۍ یو ثابت او د مدیریت وړ حالت ته رسېدلې او د پام وړ کموالی مو درلود.»
شمقدري د خراسان رضوي ولایت د کار بازار او د خدماتو جوړښت باندې د کډوالو د پراخ وتلو اغیز ته اشاره کړې او ويلي يې دي چې اټکلونه ښيي د دوی وتل د کار بازار، ښاري خدماتو او امنیتي برخو باندې شاوخوا ۱۰ سلنه اغېز کړی او هېڅ د پام وړ بدلون یې نه دی رامنځته کړی.
ایراني چارواکو مخکې ویلي وو، چې په ایران کې د افغان کډوالو نفوس څو میلیونو ته رسیږي.
ایران د روان کال په لومړیو کې له هغو کډوالو څخه چې د سرشمېرنې پاڼې یا اسناد لري غوښتي وو، چې له دې هېواده ووځي. د دې کسانو شمیر دوه میلیونه ښودل شوی وو.
د دې ترڅنګ له پاکستان څخه هم د کډوالو د ایستلو پروسه روانه ده. دا په داسې حال کې ده چې افغانستان د اقتصادي بحران سره مخ دی او خلک بې کاره دي. خو، په همدې حال کې بیا یو شمیر کډوال هڅه کوي چې په قاچاقي لارو ځانونه بیرته ایران ته ورسوي.
