اطلاعات روز: کونړ کې ځایي سرچینې خبر ورکوي، چې د دغه ولایت په اسمار ولسوالۍ کې د یوې ناچاودې سرګلولې د چاودنې له امله یوه مېرمن مړه او د یوه ماشوم په ګډون دوه کسان نور ټپیان شوي.
سرچینه وایي، دا پېښه تېره ورځ (چهارشنبه ۱۷ د مرغومي) غرمه مهال د اسمار ولسوالۍ په «اغزباغ» سیمه کې را منځته شوې.
سرچینې زیاتوي، چې د دې پېښې له امله ټپي شوي روغتون ته لېږدول شوي، خو روغتیایي وضعیت یې نازک ښودل شوی.
تر اوسه د دغې چاودنې په تړاو کونړ لپاره د طالبانو ځایي مسوولینو څه نه دي ویلي او نه هم د دې پیښې څرنګوالی په ډاګه شوی دی.
دا په داسې حال کې ده، چې دوه ورځې وړاندې هم د کونړ د نورګل ولسوالۍ په مزار دره کې د هاوان د ناچاودې مرمۍ د چاودنې له امله اووه کسان مړه او ټپیان شوي وو.
