د افغانستان لپاره د ملګرو ملتونو د مرستندویه پلاوي (یوناما) ویلي، چې د روان میلادي کال د اپرېل له لومړۍ نېټې څخه د جون تر ۳۰مې پورې یې د طالبانو د امر بالمعروف او نهي عن المنکر د مامورینو له لوري د ښځو او نارینهوو د ۳۸۹ خپلسرو نیونو پېښې ثبت کړې دي.
یوناما په خپل د افغانستان د بشري حقونو د وضعیت په هغه راپور کې چې نن (سهشنبه، ۶ د زمري) خپور شوی ویلي، چې په همدې موده کې ۶۵ نورې ښځې او نارینه د طالبانو د امر بالمعروف او نهي عن المنکر د مامورینو له ناوړه چلند سره هم مخ شوي دي.
د یوناما د راپور له مخې، دغه نیونې او ناوړه چلندونه تر ډېره د بېحجابۍ د ادعا، د ږیرې او وېښتانو د «لوېدیځ سبک» له مخې د سمولو، او د موسیقۍ د غږولو یا اورېدو له امله شوي دي.
طالبانو پر افغانستان د بیا واکمنېدو وروسته د خلکو پر عامه او شخصي ژوند پراخ محدودیتونه لګولي دي.
دې ډلې په خپل د امر بالمعروف او نهي عن المنکر قانون کې د ښځو لپاره د ټول بدن پټول لازمي بللي او د ښځو غږ یې «عورت» ګڼلی دی.
طالبانو همدارنګه د نارینهوو د ږیرې او وېښتانو هغه ډول سمول چې دوی یې «لوېدیځ سبک» بولي، منع کړي او په وار وار یې ځوانان د همدې دلیل له امله نیولي او ځورولي دي.
دې ډلې د موسیقۍ اورېدل او غږول هم حرام اعلان کړي او څو ځله یې د خلکو د ودونو، خوښیو او مېلو پر مراسمو یرغلونه کړي، چې ګډونوال او تنظیموونکي یې نیولي دي.
